ജീപ്പ് കുറുകെ നിര്‍ത്തി സിനിമാ സ്റ്റൈലില്‍ പ്രതികളെ അറസ്റ്റ് ചെയ്ത് പൊലീസ്; പയ്യന്നൂരില്‍ നിന്ന് മോഷ്ടിച്ച കാര്‍ കോഴിക്കോട് വച്ച് പിടികൂടി
കോഴിക്കോട്: മോഷണം പോയ കാര്‍ മണിക്കൂറുകള്‍ക്കകം പിടികൂടി പൊലീസ്. ഇന്നലെ പുലര്‍ച്ചെ പയ്യന്നൂരില്‍ നിന്ന് മോഷണം പോയ കാറാണ് കോഴിക്കോട് വച്ച് മാറാട് പൊലീസ് പിടികൂടിയത്. ഇന്‍സ്‌പെക്ടര്‍ എന്‍.രാജേഷ് കുമാറിന്റെ നേതൃത്വത്തിലുള്ള പൊലീസ് സംഘമാണ് കാര്‍ തടഞ്ഞ് പ്രതികളെ അറസ്റ്റ് ചെയ്തത്.
കാര്‍ മോഷ്ടിച്ച മലപ്പുറം പുളിക്കല്‍ കെ.അജിത് (23), ചാലക്കുടി എരയകുടി ചെമ്പാട്ട് ആര്‍.സി.റിയാസ് (22) എന്നിവരെയാണ് പൊലീസ് അറസ്റ്റ് ചെയ്തത്. മാറാട് പൊലീസ് കാര്‍ സഹിതം പ്രതികളെ ടൗണ്‍ പൊലീസിന് കൈമാറി. ഇന്‍സ്‌പെക്ടര്‍ ബൈജു കെ. ജോസിന്റെ നേതൃത്വത്തില്‍ പ്രതികളെ ചോദ്യം ചെയ്തു. രാത്രിയോടെ പയ്യന്നൂര്‍ പൊലീസ് എത്തി പ്രതികളെ കസ്റ്റഡിയില്‍ വാങ്ങി.
പയ്യന്നൂരില്‍ നിന്ന് മോഷണം പോയ കാര്‍ കോഴിക്കോട് ഭാഗത്തേക്ക് വന്നതായി പൊലീസിന് വിവരം ലഭിച്ചതാണ് കേസില്‍ നിര്‍ണ്ണായകമായത്. തുടര്‍ന്ന് മാറാട് പൊലീസിന് കാറിന്റെ ചിത്രം ഉള്‍പ്പെടെയുള്ള വിവരങ്ങള്‍ കൈമാറി. കാര്‍ പോകുന്നത് ശ്രദ്ധയില്‍ പെട്ടതോടെ പൊലീസ് ജീപ്പ് പിന്തുടരുകയായിരുന്നു. തുടര്‍ന്ന് കാറിന് കുറുകെ ജീപ്പ് നിര്‍ത്തി സിനിമാ സ്റ്റൈലിലാണ് പൊലീസ് പ്രതികളെ പിടികൂടിയത്.