നഷ്ടങ്ങള്‍ക്ക് സ്മാരകങ്ങള്‍ തീര്‍ത്ത് അവയെ നാം ഓര്‍മ്മയിലേക്ക് നിലനിര്‍ത്താറുണ്ട്. ഓരോ മനുഷ്യരുടെ സൂക്ഷിപ്പിലുമുണ്ടാകും അങ്ങനെയുള്ള ഒരു സ്മാരകമെങ്കിലും. അതുപോലൊരു സ്മാരകത്തെക്കുറിച്ചാണ് ഇവിടെ പറയുന്നത്. കൊയിലാണ്ടി ദ്വാരക തിയേറ്ററിന് സമീപം കോസ്‌മോസ് ഇലക്ട്രിക് ഷോപ്പ് ജീവനക്കാരനായ സച്ചിയാണ് ഈ സ്മാരകത്തിന്റെ ഉടമ. സ്മാരകം തീര്‍ത്തത് ഒരു സച്ചി ഒറ്റയ്ക്കാണെങ്കിലും ആ നഷ്ടം അയാളുടെ മാത്രം നഷ്ടമല്ല. കൊയിലാണ്ടിക്കാരുടെ ആകെ നഷ്ടമാണ്.

കൊയിലാണ്ടിക്കാര്‍ക്ക് തണലും തണുപ്പുമായിരുന്ന, കൊയിലാണ്ടിയുടെ മുഖമുദ്രയായിരുന്ന ആ ആല്‍മരത്തെ ഓര്‍മ്മയില്ലേ. 2018 ജൂണ്‍ ഒമ്പതിന് നിര്‍ത്താതെ പെയ്ത മഴയിലും ഒപ്പം കൂടിയ കാറ്റിനുമിടയില്‍ ആര്‍ക്കും വലിയ ബുദ്ധിമുട്ടുണ്ടാക്കാതെ, ആരെയും നോവിക്കാതെ പോയ ആ ആല്‍മരം തന്നെ. ആല്‍മരം കടപുഴകി വീണ് കൊയിലാണ്ടിയാകെ ബഹളത്തില്‍ മുങ്ങിനില്‍ക്കുന്ന സമയത്ത് സച്ചി ആ മരത്തിന്റെ രണ്ടിലകളുമായി നേരെ പോയത് ബാബാസ് സ്റ്റുഡിയോയിലാണ്. ‘എനിക്കിതൊന്ന് ഫ്രയിം ചെയ്തു തരണം’ എന്ന് സ്റ്റുഡിയോയിലെത്തി സച്ചി പറഞ്ഞപ്പോള്‍ അത് കേട്ടയാള്‍ക്കും അത്ഭുതമൊന്നും തോന്നിക്കാണില്ല. കാരണം ഒരിക്കലെങ്കിലും കൊയിലാണ്ടിയില്‍ വന്ന് സമയം ചെലവഴിച്ചവര്‍ക്കൊന്നും ആ ആല്‍മരത്തെ അത്ര നിസാരമായ ഒന്നായി കാണാന്‍ കഴിയില്ല.

ഈ ആല്‍മരവുമായുള്ള അടുപ്പമെന്താണെന്ന് ചോദിച്ചപ്പോള്‍ സച്ചിയുടെ വാക്കുകള്‍ ഇങ്ങനെ ”ഞങ്ങളെ ഷോപ്പ് അതിന്റെ മുമ്പിലായിരുന്നു, അതിന്റെ കാറ്റുംകൊണ്ട് ഇങ്ങനെ ഇരിക്കലായിരുന്നു പ്രധാന ആനന്ദം, ഒരുദിവസം കണ്‍മുന്നില്‍ വെച്ച് അതങ്ങ് വീണപ്പോള്‍ ആ നഷ്ടം ഉള്‍ക്കൊള്ളാനായില്ല”.

ഒരുപാട് പേരുടെ ജീവിതം ആ ആലിന്റെ പരിസരത്തുകൂടെ കഴിഞ്ഞുപോയിട്ടുണ്ടെന്നും സച്ചി കൊയിലാണ്ടി ന്യൂസ് ഡോട് കോമിനോടു പറഞ്ഞു. ”നാരാങ്ങാ കച്ചവടം നടത്തുന്നവര്‍, ചെരുപ്പ് തുന്നുന്നവര്‍, പൂക്കള്‍ വില്‍ക്കുന്നവര്‍, പച്ചക്കറികള്‍ വില്‍ക്കുന്നവര്‍, അങ്ങനെ ഒരുപാട് പേരെ ജീവിതച്ചൂട് കുറച്ചുകൊണ്ടാണ് ആ മരം നിന്നിരുന്നത്.”

കൊയിലാണ്ടിയെ സംബന്ധിച്ച് ആ നഷ്ടം ഒരിക്കലും നികത്താനാവാത്ത ഒന്നുതന്നെയാണെന്നും സച്ചി പറയുന്നു. അതിന്റെ സ്മാരകമെന്നോണം സൂക്ഷിച്ച ആ ഇലകള്‍ക്ക് ഒരുപാട് പേരുടെ ഓര്‍മ്മകളെ ഉണര്‍ത്താനാവുമെന്നും അദ്ദേഹം ഉറച്ചു വിശ്വസിക്കുന്നു. പന്തലായനി കാട്ടുവയല്‍ സ്വദേശിയാണ് സച്ചി.