കണ്ണൂരില്‍ പ്രതിയെ പിടികൂടാനെത്തിയ പോലീസ് സംഘത്തിന് നേരെ വെടിവെപ്പ്; ഒരാള്‍ അറസ്റ്റില്‍
കണ്ണൂര്‍: ചിറക്കലില്‍ പ്രതിയെ പിടിക്കാനെത്തിയ പോലീസ് സംഘത്തിന് നേരെ വെടിവെപ്പ്. ഒരാളെ പൊലീസ് അറസ്റ്റ് ചെയ്തു. സംഭവത്തില്‍ ആര്‍ക്കും പരിക്കുകളില്ല. എന്നാല്‍ പ്രതി പോലീസിനെ വെട്ടിച്ച് കടന്നു കളഞ്ഞു. വെള്ളിയാഴ്ച രാത്രി പത്ത് മണിയോടെയായിരുന്നു സംഭവം.
തമിഴ്‌നാട് സ്വദേശിയെ പേപ്പര്‍ കട്ടര്‍ കൊണ്ട് ആക്രമിച്ച കേസില്‍ പ്രതിയായ റോഷനെ പിടികൂടാനായി ചിറക്കലിലുള്ള ഇയാളുടെ വീട്ടിലെത്തിയതായിരുന്നു പോലീസ്. വളപട്ടണം എസ്.ഐ നിഥിന്റെ നേതൃത്വത്തിലുള്ള സംഘം രണ്ട് നില വീടിന്റെ പിന്നിലുള്ള കോണിപ്പടിയിലൂടെ മുകള്‍ നിലയിലെത്തി. റോഷന്റെ മുറിയ്ക്ക് മുന്നില്‍ നിന്ന് വാതിലില്‍ മുട്ടി വിളിക്കുന്നതിനിടെയാണ് ഇയാളുടെ പിതാവ് ബാബു തോമസ് പോലീസിന് നേരെ വെടിയുതിര്‍ത്തത്. ഈ സമയം കൊണ്ട് റോഷന്‍ ഓടി രക്ഷപ്പെടുകയായിരുന്നു.
ബാബു തോമസിനെ പോലീസ് കീഴ്‌പ്പെടുത്തി അറസ്റ്റ് ചെയ്തു. ഇയാളെ ചോദ്യം ചെയ്തു വരികയാണ്. തമിഴ്‌നാട് സ്വദേശിയായ ബാലാജിയെ ഒക്ടോബര്‍ 22നാണ് പേപ്പര്‍ കട്ടര്‍ കൊണ്ട് പ്രതി റോഷന്‍ അക്രമിച്ചത്. ഇത് കൂടാതെ നിരവധി കേസുകളില്‍ പ്രതിയാണ് ഇയാള്‍. സംഭവത്തില്‍ വിശദമായ അന്വേഷണം തുടങ്ങിയതായി പൊലീസ് അറിയിച്ചു.