ആഘോഷങ്ങള്‍ക്ക് പൊലിമ കൂട്ടാന്‍ ഗാനമേളയും പാണ്ടിമേളവും; നടേരി കാവുംവട്ടം പാറേച്ചാല്‍ ദേവീക്ഷേത്ര മഹോത്സവും ഫെബ്രുവരി ഒന്ന് മുതല്‍
കൊയിലാണ്ടി: നടേരി കാവുംവട്ടം പാറേച്ചാല്‍ ദേവീക്ഷേത്ര മഹോത്സവം ഫെബ്രുവരി ഒന്നുമുതല്‍ അഞ്ച് വരെ നടക്കും. ഫെബ്രുവരി ഒന്നിന് കലവറ നിറക്കല്‍ ചടങ്ങ് നടക്കും. തുടര്‍ന്ന് പാറേച്ചാല്‍ കലാക്ഷേത്ര വാദ്യകലാകാരന്മാരുടെ ചെണ്ടമേളസമര്‍പ്പണമുണ്ടാകും. രാത്രി തിരുവാതിരക്കളിയോടെ അന്നത്തെ ആഘോഷ പരിപാടികള്‍ അവസാനിക്കും.
ഫെബ്രുവരി രണ്ടിന് പ്രാദേശിക കലാകാരന്മാരുടെ കലാപരിപാടികള്‍ അരങ്ങേറും. തിങ്കളാഴ്ചയാണ് കൊടിയേറ്റം. അന്നേദിവസം ഉത്സവാഘോഷങ്ങളുടെ ഭാഗമായി ചാലക്കുടി സുധീഷ് നയിക്കുന്ന മെഗാ ഗാനമേളയുണ്ടായിരിക്കും. ചൊവ്വാഴ്ച പൂജയും ക്ഷേത്രചടങ്ങുകളും സമൂഹസദ്യയും ഇളനീര്‍കുല വരവും താലപ്പൊലിയും പാണ്ടിമേളവും തിറകളുമുണ്ടാകും. ബുധനാഴ്ച മധ്യമഗുരുതി സമര്‍പ്പണത്തോടെ ആഘോഷ പരിപാടികള്‍ അവസാനിക്കും.
ഉത്സവാഘോഷങ്ങള്‍ ഗംഭീരമാക്കുന്നതിനായി നാട്ടുകാരെയും ഭക്തജനങ്ങളെയും ഉള്‍പ്പെടുത്തി കമ്മിറ്റി രൂപീകരിച്ചു. ആഘോഷ കമ്മിറ്റി ചെയര്‍മാനായി പിലാക്കാട്ട് ശ്രീധരന്‍ മാസ്റ്റര്‍, ജനറല്‍ കണ്‍വീനര്‍ സുജിത്ത്.എസ്.പി എന്നിവരെ തിരഞ്ഞെടുത്തു. ക്ഷേത്രം ട്രസ്റ്റ് ചെയര്‍മാന്‍ കെ.പി.സുജാതന്‍ സ്വാഗതവും പിലാക്കാട്ട് ശ്രീധരന്‍ മാസ്റ്റര്‍ അധ്യക്ഷതയും വഹിച്ചു.
സി.ഗോപാലന്‍ ആമുഖ പ്രസംഗവും ആഘോഷ പരിപാടികളുടെ വിശദീകരണം ഗണേഷും നടത്തി. സി.പി.ഭാസ്‌കരന്‍ നന്ദി പ്രകാശിപ്പിച്ചു. വിവിധ സബ് കമ്മിറ്റി ഭാരവാഹികളായി പി.രാജന്‍ മാസ്റ്റര്‍, ടി.ഗിരീഷ് മാസ്റ്റര്‍, പി.പി.ഫാസില്‍, ഇന്ദിര ടീച്ചര്‍, ശ്രീധരന്‍ നായര്‍ പുഷ്പശ്രീ, ഷംസു മഞ്ഞളാട്കുന്ന്, കെ.പി.അജിത, സുലോചന.എം, സുരേഷ്.കെ.എം, ഗണേഷ് ഒ.പി, സുരേഷ്.വി.പി, പ്രവീണ്‍.കെ.എം, സോണിറ്റ് ടി.പി, റിഞ്ചു എസ്.ആര്‍, രന്തീഷ്.കെ, അനീഷ്.കെ.എം, മൃദുല്‍.കെ, പ്രജീന.കെ.പി, പ്രീതി.കെ.എം എന്നിവരെ തിരഞ്ഞെടുത്തു.
Summary: Nateri Kavumvattam Parechal Devikshetra Mahotsam from February 1