കൊടുവള്ളി: കട കുത്തിത്തുറന്നു പണവും സാധനങ്ങളും കവരുന്നതിന്റെ സി.സി.ടി.വി ദൃശ്യങ്ങള്‍ പുറത്ത്. വാരിക്കുഴിത്താഴം പാഷാ സ്റ്റോറിലാണ് നവംബര്‍ 19ന് പുലര്‍ച്ചെ മോഷണം നടന്നത്. 15,000 രൂപ, 8,000 രൂപയുടെ സിഗരറ്റ് ഉല്‍പന്നങ്ങള്‍, 2,000 രൂപയുടെ സൗന്ദര്യവര്‍ധക വസ്തുക്കള്‍, ഉടമ ജീലാനി പാഷയുടെ വിവിധ രേഖകള്‍ അടങ്ങിയ പഴ്‌സ് തുടങ്ങിയവയാണ് രണ്ടു മോഷ്ടാക്കള്‍ കവര്‍ന്നത്.

ബൈക്കിലെത്തിയ മോഷ്ടാക്കള്‍ ഇരുമ്പ് കമ്പി ഉപയോഗിച്ച് കടയുടെ ഗ്രില്ലിന്റെ പൂട്ടുപൊളിക്കുകയും തുടര്‍ന്നു ഷട്ടര്‍ പൂട്ടും തകര്‍ത്ത് പണവും വസ്തുക്കളും കവരുകയായിരുന്നു. മോഷ്ടാക്കളുടെ ദൃശ്യം കടയിലെ സിസിടിവിയില്‍ പതിഞ്ഞിട്ടുണ്ട്. കൊടുവള്ളി സ്റ്റേഷന്‍ ഓഫിസര്‍ പി.ചന്ദ്രമോഹന്‍, എസ്.ഐമാരായ പി.പ്രകാശന്‍, രശ്മി എന്നിവരുടെ നേതൃത്വത്തില്‍ കൊടുവള്ളി പൊലീസും ഡോഗ് സ്‌ക്വാഡ്, വിരലടയാള വിദഗ്ധര്‍ എന്നിവരും സ്ഥലത്തെത്തി പരിശോധന നടത്തി. പൊലീസ് കേസെടുത്ത് അന്വേഷണമാരംഭിച്ചു.