ബൈക്കില്‍ നിന്ന് വീണ് പരിക്കേറ്റ് ചികിത്സയിലായിരുന്ന കൊടക്കാട്ടുംമുറി സ്വദേശിനിയായ യുവതി മരിച്ചു
കൊയിലാണ്ടി: ബൈക്കില്‍ നിന്ന് വീണ് ഗുരുതരമായി പരിക്കേറ്റ് ചികിത്സയിലായിരുന്ന യുവതി മരിച്ചു. കൊടക്കാട്ടുംമുറി ചാത്തോത്ത് നിജിഷയാണ് മരിച്ചത്. മുപ്പത്തിയൊന്ന് വയസായിരുന്നു.
ശനിയാഴ്ച രാവിലെയാണ് അപകടമുണ്ടായത്. ഭര്‍ത്താവ് അരുണിനൊപ്പം ബൈക്കില്‍ ആനക്കുളത്തേക്ക് പോകുകയായിരുന്നു നിജിഷ. യാത്രയ്ക്കിടെ ബൈക്കില്‍ നിന്ന് റോഡിലേക്ക് വീഴുകയായിരുന്നു.
തുടര്‍ന്ന് കൊയിലാണ്ടി താലൂക്ക് ആശുപത്രിയിലും കോഴിക്കോട് മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. ഇന്നലെ രാത്രിയോടെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. വെന്റിലേറ്ററിലായിരുന്ന നിജിഷ ഞായറാഴ്ച 12:30 ഓടെ മരണത്തിന് കീഴടങ്ങുകയായിരുന്നു.
കൊയിലാണ്ടി നോര്‍ത്ത് കോണ്‍ഗ്രസ് മണ്ഡലത്തിലെ എഴുപത്തിയാറാം ബൂത്ത് പ്രസിഡന്റായ അരുണാണ് നിജിഷയുടെ ഭര്‍ത്താവ്.
മൃതദേഹം പോസ്റ്റ്‌മോര്‍ട്ടത്തിനായി കോഴിക്കോട് ബീച്ച് ആശുപത്രിയിലേക്ക് മാറ്റി. നാളെ പോസ്റ്റ്‌മോര്‍ട്ടത്തിന് ശേഷം മൃതദേഹം കൊടക്കാട്ടുംമുറിയില്‍ പൊതുദര്‍ശനത്തിന് വയ്ക്കും. തുടര്‍ന്ന് കോഴിക്കോട്ടെ ശ്മശാനത്തില്‍ സംസ്‌കരിക്കും.