അനുസ്മരണ സമ്മേളനവും സ്‌നേഹ ജ്വാലയും; ധീര ജവാന്‍ സുബിനേഷിന്റെ എട്ടാം രക്തസാക്ഷിത്വ വാര്‍ഷിക ദിനത്തോടനുബന്ധിച്ച് കൊയിലാണ്ടിയില്‍ സംഘാടക സമിതി രൂപീകരിച്ചു
കൊയിലാണ്ടി: ധീര ജവാന്‍ സുബിനേഷിന്റെ എട്ടാം രക്തസാക്ഷിത്വ വാര്‍ഷിക ദിനത്തിനോടനുബന്ധിച്ച് യുവധാര ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബിന്റെ നേതൃത്വത്തില്‍
മുത്തുബസാറില്‍ സംഘാടക സമിതി രൂപീകരിച്ചു. നവംബര്‍ 23ന് സംഘടിപ്പിക്കുന്ന ചടങ്ങില്‍ രാവിലെ 9 മണിക്ക് സുബിനേഷിന്റെ സ്മൃതി മണ്ഡപത്തില്‍ കൊയിലാണ്ടി പോലീസ് ഇന്‍സ്‌പെക്ടര്‍ എം.വി ബിജു പതാക ഉയര്‍ത്തും.
അന്നേ ദിവസം വൈകിട്ട് 4മണിക്ക് കെ.ടി രാധാകൃഷ്ണന്‍ മാസ്റ്റര്‍ നയിക്കുന്ന ചേലിയ 7, 8 ,9 വാര്‍ഡുകളിലെ കുടുബശ്രീ അംഗങ്ങള്‍ക്കായി ക്വിസ് മത്സരം നടത്തും. ആറു മണിക്ക് നടക്കുന്ന അനുസ്മരണ സമ്മേളനം കൊയിലാണ്ടി എംഎല്‍എ കാനത്തില്‍ ജമീല ഉദ്ഘാടനം ചെയ്യും.
സുബേദാര്‍ മനേഷ് പി.വി (ശൗര്യ ചക്ര) സ്‌നേഹജ്വാല കൊളുത്തും. തുടര്‍ന്ന് പ്രശസ്ത കവി സോമന്‍ കടലൂര്‍ മുഖ്യഭാഷണം നടത്തും. എസ്എസ്എല്‍എസി, പ്ലസ്ടു ഉന്നത വിജയം നേടിയവര്‍ക്കുള്ള അനുമോദനവും ചടങ്ങില്‍ വെച്ച് നടത്തും.
പരിപാടിയോടനുബന്ധിച്ച് സ്വാഗത സംഘം ഭാരവാഹികളെയും തിരഞ്ഞെടുത്തു. ജോഷി കെ.എം (കണ്‍വീനര്‍). അമിത്ത് പി,വിനോദന്‍ എം.എം (ജോയിന്‍ കണ്‍വീനര്‍മാര്‍) സോമശേഖരന്‍ പി.വി.(ചെയര്‍മാന്‍) ,ജ്യോതിഷ് കാളക്കനാരി ബബിത്ത് ലാല്‍ (വൈസ് ചെയര്‍മന്‍മാര്‍)അശോകന്‍ കുനിയില്‍ ഖജാന്‍ജി എന്നിവരെയാണ് തിരഞ്ഞെടുത്തത്.
ചടങ്ങില്‍ ബ്ലോക്ക് പഞ്ചായത്ത് പ്രസിഡണ്ട് പി ബാബുരാജ് മുഖ്യാതിധിയാകും. ജില്ലാ പഞ്ചായത്ത് മെമ്പര്‍ സിന്ധു സുരേഷ്, ബ്ലോക്ക് പഞ്ചായത്ത് മെമ്പര്‍ കെ.ടി.എം കോയ, ഗ്രാമ പഞ്ചായത്ത് മെമ്പര്‍മാരായ മജു, കെ.എം, അബ്ദുള്‍ ഷൂക്കൂര്‍ എന്നിവര്‍ പങ്കെടുക്കും.