കൊയിലാണ്ടി: ഏതാനും ആഴ്ചകളായി സംസ്ഥാനത്ത് പലയിടത്തും ചെങ്കണ്ണ് വ്യാപകമാകുകയാണ്. കൊയിലാണ്ടി മേഖലയിലും രോഗവ്യാപനം കൂടിയിട്ടുണ്ട്. രോഗബാധയേല്‍ക്കുന്നവരില്‍ കൂടുതലും വിദ്യാര്‍ഥികളാണ്.

ക്ലാസില്‍ ഒരു കുട്ടിക്ക് രോഗം പിടിപെട്ടുകഴിഞ്ഞാല്‍ മറ്റുള്ളവര്‍ക്കെല്ലാം വരുമെന്ന അവസ്ഥയാണിപ്പോള്‍. ക്രിസ്തുമസ് പരീക്ഷ അടുത്തിരിക്കെ രോഗം വ്യാപിക്കുന്നത് വിദ്യാര്‍ഥികള്‍ക്കിടയില്‍ ആശങ്കയ്ക്ക് വഴിവെച്ചിട്ടുണ്ട്.

കണ്ണില്‍ ചുവപ്പുനിറം, കണ്ണില്‍നിന്ന് വെള്ളം ചാടല്‍, അമിതമായി ചീപോള അടിയല്‍, പ്രകാശം നോക്കാന്‍ ബുദ്ധിമുട്ട്, രാവിലെ കണ്ണ് തുറക്കാന്‍ ബുദ്ധിമുട്ട്, ചെവിയുടെ മുന്‍ഭാഗത്ത് കഴലവീക്കം, തലവേദന എന്നിവയാണ് രോഗലക്ഷണങ്ങള്‍. ചിലര്‍ക്ക് കണ്‍പോളകള്‍ക്കും കണ്ണിനുചുറ്റുമുള്ള ഭാഗത്തും നീരുവെക്കുകയും ചെയ്യുന്നു അപൂര്‍വ്വം ചിലരില്‍ നേത്രപടലത്തെ അസുഖം ബാധിക്കാറുണ്ട്.

കണ്ണുരോഗത്തിനുള്ള മരുന്നുകള്‍ കൊയിലാണ്ടി താലൂക്ക് ആശുപത്രിയില്‍ ലഭ്യമാണെന്ന് ആശുപത്രി സൂപ്രണ്ട് ഡോ.വി.വിനോദ് പറഞ്ഞു. പ്രാഥമിക, സാമൂഹിക, കുടുംബാരോഗ്യ കേന്ദ്രങ്ങളിലും ചികിത്സ ലഭ്യമാണ്. താലൂക്ക് ആശുപത്രിയില്‍ സ്ഥിരമായി നേത്രേരോഗവിദഗ്ധനില്ലാത്തത് പ്രയാസം സൃഷ്ടിക്കുന്നുണ്ട്. ആഴ്ചയില്‍ രണ്ടുദിവസം മറ്റ് ആശുപത്രികളില്‍ നിന്നും നേത്രരോഗ വിദഗ്ധനെ എത്തിച്ചാണ് നിലവില്‍ ചികിത്സ നല്‍കുന്നതെന്നും സൂപ്രണ്ട് പറഞ്ഞു.

എന്താണ് ചെങ്കണ്ണ്?

കണ്ണില്‍ ഉണ്ടാകുന്ന ഒരു രോഗാണുബാധയാണ് ചെങ്കണ്ണ്. കണ്ണ് ദീനം എന്ന പേരിലും ഈ രോഗം അറിയപ്പെടുന്നു. ബാക്ടീരിയ, വൈറസ് എന്നിവ മൂലം ചെങ്കണ്ണ് ബാധിക്കാമെന്നതിനാല്‍ കൃത്യമായ ചികിത്സയ്ക്ക് നേത്രരോഗ വിദഗ്ധനെ സമീപിക്കേണ്ടതാണ്.

കണ്ണ് ചുവപ്പ്, അമിത കണ്ണുനീര്‍, കണ്‍പോളകളില്‍ വീക്കം, ചൊറിച്ചില്‍, പഴുപ്പ്, രാവിലെ എഴുന്നേല്‍ക്കുമ്പോള്‍ പഴുപ്പ് കാരണം കണ്ണ് തുറക്കാന്‍ പ്രയാസം എന്നിവയാണ് ചെങ്കണ്ണിന്റെ ലക്ഷണം.

എത്ര ദിവസം വിശ്രമിക്കണം

ചെങ്കണ്ണ് ബാധിച്ചാല്‍ സാധാരണ ഗതിയില്‍ 5 മുതല്‍ 7 ദിവസം വരെ നീണ്ടു നില്‍ക്കാം. രോഗം സങ്കീര്‍ണമായാല്‍ 21 ദിവസംവരേയും നീണ്ടുനില്‍ക്കാം. ചെങ്കണ്ണ് ബാധിച്ചാല്‍ എത്രയും വേഗം നേത്രരോഗ വിദഗ്ധന്റെ നിര്‍ദേശ പ്രകാരം ചികിത്സ തേടണം. രോഗമുള്ള കുട്ടികളെ സ്‌കൂളില്‍ വിടരുത്. കുട്ടികളുള്‍പ്പെടെ എല്ലാവരും രോഗം ഭേദമാകുന്നതുവരെ വീട്ടില്‍ വിശ്രമിക്കുക.

ശ്രദ്ധിക്കേണ്ട കാര്യങ്ങള്‍

ചെങ്കണ്ണ് വളരെപ്പെട്ടെന്ന് പടര്‍ന്നു പിടിക്കാന്‍ സാധ്യതയുണ്ട്. അതിനാല്‍ ചെങ്കണ്ണ് ബാധിക്കാതിരിക്കാന്‍ പ്രത്യേകം ശ്രദ്ധിക്കേണ്ടതാണ്. വ്യക്തി ശുചിത്വം ഏറെ പ്രധാനമാണ്. രോഗമുള്ള വ്യക്തി ഉപയോഗിക്കുന്ന ഓരോ സാധനത്തിലും രോഗാണു പടരാന്‍ സാധ്യതയുണ്ട്. ഈ പ്രതലങ്ങളില്‍ രോഗമില്ലാത്തയാള്‍ സ്പര്‍ശിച്ചാല്‍ അതുവഴി രോഗാണുക്കള്‍ കണ്ണിലെത്താന്‍ സാധ്യതയുണ്ട്.

രോഗം ബാധിച്ച വ്യക്തികളില്‍ നിന്നും അകലം പാലിക്കണം. രോഗി ഉപയോഗിക്കുന്ന പേന, പേപ്പര്‍, പുസ്തകം, തൂവാല, സോപ്പ്, ടവ്വല്‍ മുതലയാവ മറ്റുള്ളവര്‍ ഉപയോഗിക്കാന്‍ പാടില്ല. ഇടയ്ക്കിടയ്ക്ക് സോപ്പും വെള്ളവും ഉപയോഗിച്ച് കൈ കഴുകണം. കൈ വൃത്തിയായി കഴുകുന്നതിന് മുമ്പ് കണ്ണിലോ മൂക്കിലോ വായിലോ ഒരു കാരണവാശാലും തൊടരുത്. വീട്ടില്‍ ചെങ്കണ്ണ് ബാധിച്ച വ്യക്തിയുണ്ടെങ്കില്‍ കുട്ടികള്‍ക്ക് രോഗം ബാധിക്കാതിരിക്കാന്‍ പ്രത്യേകം ശ്രദ്ധിക്കണം. കണ്ണിന് ആയാസമുണ്ടാകുന്ന ജോലികള്‍ ചെയ്യരുത്. ചികിത്സ തേടി വിശ്രമമെടുത്താല്‍ എത്രയും വേഗം ചെങ്കണ്ണ് ഭേദമാകുന്നതാണ്.