ജില്ലാ കേരളോത്സവത്തിന്റെ ഭാഗമായുള്ള ഫുട്‌ബോള്‍ മത്സരത്തില്‍ ചാമ്പ്യന്മാരായി കൊയിലാണ്ടി നഗരസഭ. ഫൈനല്‍ മത്സരത്തില്‍ പേരാമ്പ്ര ബ്ലോക്ക് പഞ്ചായത്തിനെ 2-1ന് പരാജയപ്പെടുത്തിയാണ് കൊയിലാണ്ടി വിജയികളായത്. ഡിസംബര്‍ 9,10 തീയതികളിലായി കൊയിലാണ്ടി സ്‌പോര്‍ട്‌സ് കൗണ്‍സില്‍ സ്റ്റേഡിയത്തിലാണ് ഫുട്‌ബോള്‍ മത്സരങ്ങള്‍ നടന്നത്.

പ്രീക്വാര്‍ട്ടര്‍ മുതലുള്ള മത്സരങ്ങളാണ് രണ്ടാം ദിവസം നടന്നത്. കൊയിലാണ്ടി, രാമനാട്ടുകര, കൊടുവള്ളി, ഫറോക്ക്, മുക്കം, മുനിസിപ്പാലിറ്റികളും മേലടി, ബാലുശ്ശേരി, പയ്യോളി, പേരാമ്പ്ര, തോടന്നൂര്‍, കൊടുവള്ളി, വടകര, ചേളന്നൂര്‍, കുന്നുമ്മല്‍, കോഴിക്കോട് ബ്ലോക്ക് പഞ്ചായത്തുകളും മത്സരത്തില്‍ പങ്കെടുത്തു.

സമാപന ചടങ്ങ് ജില്ലാ പഞ്ചായത്ത് വൈസ് പ്രസിഡന്റ് എം.പി. ശിവാനന്ദന്‍ ഉദ്ഘാടനം ചെയ്തു. പന്തലായനി ബ്ലോക്ക് പഞ്ചായത്ത് പ്രസിഡന്റ് ബാബുരാജ് അധ്യക്ഷത വഹിച്ചു. വിജയികള്‍ക്കുള്ള സമ്മാനദാനവും എം.പി.ശിവാനന്ദന്‍ നിര്‍വഹിച്ചു.

ജില്ലാ പഞ്ചായത്ത് പ്രസിഡന്റ് ഷീജ ശശി, കൊയിലാണ്ടി മുനിസിപ്പാലിറ്റി വൈസ് ചെയര്‍മാന്‍ അഡ്വ.കെ.സത്യന്‍, പന്തലായനി, ചേളന്നൂര്‍, വടകര ബ്ലോക്ക് പഞ്ചായത്ത് പ്രസിഡന്റുമാര്‍, ജില്ലാ പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍പേഴ്‌സന്മാര്‍, ജില്ല പഞ്ചായത്ത് അംഗങ്ങള്‍, അടക്കമുള്ള ജനപ്രതിനിധികള്‍, ജില്ലാ പഞ്ചായത്ത് ഫിനാന്‍സ് ഓഫീസര്‍ എം.ടി.പ്രേമന്‍, സീനിയര്‍ സൂപ്രണ്ട് കെ.രാജേഷ് എന്നിവര്‍ സന്നിഹിതരായിരുന്നു.