പേരാമ്പ്ര: കാവിൽ പള്ളിയത്ത് കുനിയിൽ എം.ഡി.എം.എയുമായി യുവാവ് അറസ്റ്റില്‍. കാവുന്തറ സ്വദേശി ചെറിയ പറമ്പിൽ മുഹമ്മദലി എന്ന നട്ട് മമ്മാലി (29) ആണ് പിടിയിലായത്‌. പേരാമ്പ്ര പോലീസും പേരാമ്പ്ര ഡി.വൈ.എസ്.പി വി.വി ലതീഷിൻ്റെ കീഴിലുള്ള ലഹരി വിരുദ്ധ സ്ക്വാഡും ചേർന്നാണ് പ്രതിയെ ഇന്നലെ വൈകുന്നേരം അറസ്റ്റ് ചെയ്തത്‌.

ഇയാളില്‍ നിന്നും വിൽപ്പനയ്ക്കായി പാക്കറ്റുകളാക്കി സൂക്ഷിച്ച 0.200 മില്ലി ഗ്രാം എം.ഡി.എം.എയും, തൂക്കുന്ന ത്രാസും, ചില്ലു കുഴലും പിടിച്ചെടുത്തതായി പോലീസ് പറഞ്ഞു. എം.ഡി.എം.എ വിൽപന നടത്തി കിട്ടിയ 8000ത്തിൽപരം രൂപയും ഇയാളില്‍ നിന്നും പിടിച്ചെടുത്തു.

പ്രതി കുട്ടികൾക്കടക്കം എം.ഡി.എം.എ വിൽപന നടത്തിയിരുന്നതായി നാട്ടുകാർക്ക് നേരത്തേ പരാതിയുണ്ടായിരുന്നു. തുടർന്ന് ഒരാഴ്ചയായി പോലീസ് ഇയാളെ നിരീക്ഷിച്ചു വരികയായിരുന്നു. എം.ഡി.എം.എ കൈവശം വെച്ചതിന് പ്രതിക്കെതിരെ പേരാമ്പ്ര പോലീസ് കേസ് രജിസ്റ്റർ ചെയ്തു.

Description: Youth arrested with MDMA in Perambra