കൊയിലാണ്ടി: ബിയര്‍ നല്‍കി പതിനാറുകാരിയെ ലൈംഗികമായി പീഡിപ്പിച്ച പ്രതികള്‍ക്ക് ഇരുപത്തി അഞ്ച് വര്‍ഷം കഠിന തടവും, എഴുപത്തി അയ്യായിരം രൂപ പിഴയും പുറപ്പെടുവിച്ച് കൊയിലാണ്ടി പോക്‌സോ അതിവേഗ കോടതി.

പുറക്കാട്ടെരി,പേരിയയില്‍ വീട്ടില്‍ സുബിന്‍(23) തലക്കുളത്തൂര്‍, കണ്ടങ്കയില്‍ വീട്ടില്‍ അശ്വന്ത്( 24) തലകുളത്തൂര്‍ അന്നശ്ശേരി, കണിയേരിമീത്തല്‍ വീട്ടില്‍ അവിനാഷ് (23), എന്നുവര്‍ക്കാണ് ശിക്ഷ വിധിച്ചത്. കൊയിലാണ്ടി ഫാസ്റ്റ് ട്രാക്ക് സ്പെഷ്യല്‍ കോടതി ജഡ്ജ് എം. സുഹൈബ് പോക്‌സോ നിയമ പ്രകാരവും, ഇന്ത്യന്‍ ശിക്ഷാ നിയമപ്രകാരവുമാണ് ഇവര്‍ക്ക് ശിക്ഷ വിധിച്ചത്.

2022 ല്‍ ആണ് കേസ് ആസ്പദമായ സംഭവം, ക്ലാസ്സ് കഴിഞ്ഞു വീട്ടിലേക്കു വരികയായിരുന്ന പെണ്‍കുട്ടിയെ വീട്ടില്‍ കൊണ്ടുവിടാം എന്നു പറഞ്ഞു പ്രതികള്‍ ബൈക്കില്‍ പാലോറമലയില്‍ ആളൊഴിഞ്ഞ പറമ്പില്‍ കൊണ്ടുപോയി ബിയര്‍ നല്‍കി മൂന്നു പേരും ലൈംഗികമായി പീഡിപ്പിക്കുകയായിരുന്നു. പെണ്‍കുട്ടി പിന്നീട് പീഡന വിവരം പുറത്തു പറയുകയായിരുന്നു.

എലത്തൂര്‍ പോലീസ് രജിസ്റ്റര്‍ ചെയ്ത കേസ്സ് കോഴിക്കോട് അസിസ്റ്റന്റ് കമ്മിഷണര്‍ ബിജുരാജ് പി ആണ് അന്വേഷിച്ചത്, പ്രോസീക്യൂഷനു വേണ്ടി അഡ്വ പി ജെതിന്‍ ഹാജരായി.