---

കൊയിലാണ്ടി: ന​ഗരസഭയിലെ 12-ാം വാർഡിലുള്ള വയോധികന് ചെള്ളുപനി സ്ഥിരീകരിച്ചതായി സംശയം. കോഴിക്കോട്ടെ സ്വകാര്യ ആശുപത്രിയിൽ ചികിത്സയിൽ കഴിയുന്ന 79 വയസ്സുള്ള ആൾക്ക് രോ​ഗം സ്ഥിരീകരിച്ചതായി വിവരം ലഭിച്ചിട്ടുണ്ട്. എന്നാൽ ഇതു സംബന്ധിച്ച
ഔ​ദ്യോ​ഗികമായ റിപ്പോർട്ട് ആശുപത്രിയിൽ നിന്ന് ഇതുവരെ ലഭിച്ചിട്ടില്ലെന്നും പന്തലായിനി മേഖലയുടെ ചുമതലയുള്ള ഹെൽത്ത് ഇൻസ്പെക്ടർ രാജീവൻ കൊയിലാണ്ടി ന്യൂസ് ഡോട് കോമിനോട് പറഞ്ഞു.

പനിയെ തുടർന്ന് കൊയിലാണ്ടിയിലെ സ്വകാര്യ ആശുപത്രിയിൽ വയോധികൻ ചികിത്സ തേടിയിരുന്നു. രോ​ഗം ഭേദമാകാത്തതിനെ തുടർന്ന് കോഴിക്കോടേക്ക് മാറ്റുകയായിരുന്നു. അവിടെ നടത്തിയ പരിശോധനയിലാണ് ചെള്ളുപനി സ്ഥിരീകരിച്ചതെന്നാണ് വിവരം.

പന്തലായനി ഭാ​ഗത്തുള്ള ആൾക്കാണ് രോ​ഗമുള്ളതായി സംശയിക്കുന്നത്. പ്രദേശത്ത് പ്രതിരോധ നടപടികൾ ആരംഭിച്ചതായി കൗൺസിലർ പ്രജിഷ കൊയിലാണ്ടി ന്യൂസ് ഡോട് കോമിനോട് പറഞ്ഞു. പുറത്തധികം ഇറങ്ങാത്ത ആളാണ് ഇദ്ദേഹം,രോ​ഗം ബാധിച്ചതെങ്ങനെയെന്ന് വ്യക്തമല്ലെന്നും കൗൺസിലർ പറഞ്ഞു.

വീട്ടിലുള്ള മറ്റാർക്കും പനിയോ മറ്റ് ലക്ഷണങ്ങളോ ഇല്ല. ഇവർ നിരീക്ഷണത്തിലാണുള്ളത്. പ്രദേശത്ത് ക്ലോറിനേഷൻ ഉൾപ്പെടെ നടത്തുന്നുണ്ട്. കൂടാതെ ചെള്ളുപനിയെകുറിച്ച് ആളുകളെ ബോധവത്ക്കരിക്കുന്നതിനായി വാർഡിൽ ഇന്ന് ബോധവത്ക്കരണ ക്ലാസ് സംഘടിപ്പിക്കുന്നുണ്ടെന്നും അവർ കൂട്ടിച്ചേർത്തു.

Summary:  Suspecting scrub typhus in koyilandi 79 year old man in treatment Preventive measures intensified