ജ്വല്ലറിയിലെ വിശ്വസ്തനായ ‘ഭായ്’ സ്വർണ്ണാഭരണവുമായി കടന്നു; സിനിമ സ്റ്റെെലിൽ ബംഗാൾ വരെ പിന്തുടർന്ന് പിടികൂടി പന്തീരങ്കാവ് പോലീസ്
കോഴിക്കോട്: പൊക്കുന്ന് കോന്തനാരിയിലെ ബിസ്മി ഡയമണ്ട്‌സ് എന്ന ജ്വല്ലറിയില്‍ നിന്ന് സ്വർണ്ണാഭരണം കവർന്ന് മുങ്ങിയ പ്രതിയെ വിദഗ്ദമായി പിടികൂടി പന്തീരാങ്കാവ് പൊലീസ്. പശ്ചിമ ബംഗാൾ സ്വദേശി സാബിര്‍ മാലിക്ക് 26) ആണ് അറസ്റ്റിലായത്. പൊലീസ് പശ്ചിമ ബംഗാള്‍ വരെ പിന്‍തുടര്‍ന്നാണ് പ്രതിയെ പോലീസ് അറസ്റ്റ് ചെയ്തത്.
മാര്‍ച്ച് 13ാം തീയതിയാണ് ഇയാള്‍ രണ്ട് ലക്ഷത്തോളം വിലവരുന്ന സ്വര്‍ണാഭരണങ്ങളുമായി കടന്നത്. തുടര്‍ന്ന് ഉടമകള്‍ പൊലീസ് സ്‌റ്റേഷനില്‍ പരാതി നല്‍കുകയായിരുന്നു. കേസെടുത്ത് അന്വേഷണം ആരംഭിച്ച പൊലീസിന് ഇയാള്‍ പശ്ചിമ ബംഗാളിലാണ് ഉള്ളതെന്ന് ബോധ്യമായി. തുടര്‍ന്ന് പ്രത്യേക സംഘത്തെ രൂപീകരിച്ചു. പൊലീസ് സംഘം പ്രതിയെ പിടികൂടുന്നതിനായി ബംഗാളിലേക്ക് തിരിക്കുകയായിരുന്നു. തന്നെ തേടി പൊലീസ് നാട്ടിലെത്തുമെന്ന് സാബിര്‍ മാലിക്ക് ഒട്ടും പ്രതീക്ഷിച്ചിരുന്നില്ല. അതുകൊണ്ട് തന്നെ പൊലീസിന് കാര്യങ്ങള്‍ എളുപ്പമായി.
പന്തീരാങ്കാവ് പൊലീസ് എസ്ഐ ജോസ് വി. ഡിക്രൂസ്, സിവില്‍ പൊലീസ് ഓഫീസര്‍മാരായ ബിഗിന്‍ ലാല്‍, സുബീഷ് എന്നിവരുള്‍പ്പെട്ട സംഘമാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.