പേരാമ്പ്ര വാല്യക്കോട് നിര്‍ത്തിയിട്ടിരുന്ന ലോറിയില്‍ കാറിടിച്ച് അമ്മയ്ക്കും മകള്‍ക്കും ദാരുണാന്ത്യം
പേരാമ്പ്ര: നിര്‍ത്തിയിട്ടിരിക്കുന്ന ലോറിക്ക് പിന്നില്‍ കാറിടിച്ച് അമ്മയും മകളും മരിച്ചു. വാല്യക്കോട് വച്ച് ഇന്ന് രാവിലെ ഏഴരയോടെയാണ് അപകടമുണ്ടായത്.
പേരാമ്പ്ര ടെലഫോണ്‍ എക്‌സ്‌ചേഞ്ചിന് സമീപം തെരുവത്ത്‌പൊയില്‍ കൃഷ്ണകൃപയില്‍ ശ്രീജ (48), മകള്‍ അഞ്ജന (22) എന്നിവരാണ് മരിച്ചത്. ശ്രീജയുടെ ഭര്‍ത്താവ് സുരേഷ് കുമാറിനെ ഗുരുതരമായ പരിക്കുകളോടെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഇറച്ചിക്കോഴിയുമായി എത്തിയ ലോറി വഴിയരികില്‍ നിര്‍ത്തിയിട്ടതായിരുന്നു. ബന്ധുവീട്ടിലേക്ക് പോകുകയായിരുന്ന സുരേഷ് ബാബുവും കുടുംബവും സഞ്ചരിച്ച കാര്‍ ഈ ലോറിക്ക് പിന്നില്‍ ഇടിക്കുകയായിരുന്നു.
അപകടം നടന്ന ഉടന്‍ മൂന്ന് പേരെയും പേരാമ്പ്ര താലൂക്ക് ആശുപത്രിയില്‍ എത്തിച്ചെങ്കിലും ശ്രീജയുടെയും മകളുടെയും ജീവന്‍ രക്ഷിക്കാനായില്ല. അപകടത്തില്‍ കാറിന്റെ മുന്‍ഭാഗം പൂര്‍ണ്ണമായി തകര്‍ന്നു.
