സംഘാടക സമിതിയ്ക്കായി ജൈവപച്ചക്കറികള്‍ നല്‍കി കൊയിലാണ്ടിയിലെ കര്‍ഷകര്‍; കിസാന്‍ സഭാ അഖിലേന്ത്യാ സമ്മേളനത്തിലേക്ക് കയ്യൂരില്‍ നിന്നാരംഭിച്ച കൊടിമര ജാഥയ്ക്ക് സ്വീകരണം
കൊയിലാണ്ടി: കിസാന്‍ സഭാ അഖിലേന്ത്യാ സമ്മേളനത്തിലെ പൊതുസമ്മേളന നഗറിലേയ്ക്ക് കയ്യൂരില്‍ നിന്നാരംഭിച്ച കൊടിമര ജാഥയ്ക്ക് കൊയിലാണ്ടിയില്‍ ഉജ്വല സ്വീകരണം നല്‍കി. മുത്തുക്കുടയുടെയും ബാന്റ് വാദ്യത്തോടെയും പഴയ ബസ്റ്റാന്റ് പരിസരത്തു നിന്നാണ് ജാഥയെ സ്വീകരിച്ചത്. പുതിയ ബസ്റ്റാന്റ് പരിസരത്തൊരുക്കിയ സ്വീകരണ പരിപാടിയില്‍ സി.അശ്വനി ദേവ് അധ്യക്ഷനായി.
സംഘാടക സമിതിക്കുവേണ്ടി നാട്ടിലുല്‍പാദിപ്പിച്ച ജൈവ പച്ചക്കറികള്‍ നല്‍കി കെ.സത്യന്‍ ജാഥയെ സ്വീകരിച്ചു. ജാഥാ ലീഡര്‍ വത്സന്‍ പനോളിയേയും മാനേജര്‍ ഷൗക്കത്തിനേയും നഗരസഭ ചെയര്‍പേഴ്‌സണ്‍ കെ.പി.സുധ , ടി.വി.ഗിരിജ എന്നിവരും വിവിധ വര്‍ഗ്ഗ ബഹുജന സംഘടനകള്‍ക്കു വേണ്ടിയും ഹാരാര്‍പ്പണം ചെയ്തു.
കേന്ദ്ര കമ്മിറ്റിയംഗം പി.വിശ്വന്‍, ജില്ലാ സെക്രട്ടറി ജോര്‍ജ് എം.തോമസ്, പ്രസിഡണ്ട് എം.മെഹബൂബ്, സംസ്ഥാന കമ്മറ്റി അംഗങ്ങളായ അസ്വ: ഇ.കെ.നാരായണന്‍, ബാബു പറശ്ശേരി, കെ.ഷിജു, കെ.പി.ചന്ദ്രി, തുടങ്ങിയവര്‍ പങ്കെടുത്തു. പി.കെ.ബാബു സ്വാഗതം പറഞ്ഞു. പി.സി.സതീഷ് ചന്ദ്രന്‍ നന്ദിയും പറഞ്ഞു.