കര്‍ണാടകയില്‍ നിന്ന് മദ്യക്കടത്ത്; കോഴിക്കോട് സ്വദേശിയായ 19കാരന്‍ പിടിയില്‍
കോഴിക്കോട്: പുതുവര്‍ഷത്തലേന്ന് വില്‍പ്പന നടത്താന്‍ ലക്ഷ്യമിട്ട് കര്‍ണാടകയില്‍ നിന്നും മദ്യം കടത്തിയ 19കാരന്‍ വയനാട്ടില്‍പിടിയില്‍. കോഴിക്കോട് ചേളന്നൂര്‍ വടക്കേകോങ്ങോട്ട് വീട്ടില്‍ വി.കെ.അഭിഷേക് ആണ് പിടിയിലായത്.
മുത്തങ്ങ ചെക്ക്‌പോസ്റ്റിന് സമീപം നടത്തിയ പരിശോധനയില്‍ കര്‍ണാടകയില്‍ മാത്രം വില്‍പ്പന നടത്താവുന്ന മദ്യം ഇയാളില്‍ നിന്ന് കണ്ടെടുക്കുകയായിരുന്നു. ഇയാളില്‍ നിന്നും 12 കുപ്പി മദ്യം പിടിച്ചെടുത്തു. 750 മില്ലിയുടെ നാല് കുപ്പി ബ്രാണ്ടിയും എട്ട് കുപ്പി വിസ്‌കിയുമാണ് പിടിച്ചത്.
ബത്തേരി എസ്.ഐ കെ.വി. ശശികുമാര്‍, എ.എസ്.ഐ ശിവാനന്ദന്‍, സീനിയര്‍ സി.പി.ഒമാരായ അലാവുദ്ദീന്‍, നൗഫല്‍, സന്തോഷ് കുമാര്‍, സി.പി.ഒ ശിവദാസന്‍ എന്നിവരാണ് പരിശോധന സംഘത്തിലുണ്ടായിരുന്നത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.