പിതൃക്കളുടെ ആത്മശാന്തിക്കായി പ്രാര്‍ത്ഥനയോടെ; കണയംകോട് കുട്ടോത്ത് സത്യനാരായണ ക്ഷേത്രത്തില്‍ ബലിതര്‍പ്പണ ചടങ്ങുകള്‍ക്കെത്തിയത് നൂറുകണക്കിനാളുകള്‍
കൊയിലാണ്ടി: പിതൃക്കളുടെ ആത്മശാന്തിക്കായി പ്രാര്‍ത്ഥിക്കാനും ബലിതര്‍പ്പണം നടത്താനുമെത്തിയ ആയിരക്കണക്കിന് വിശ്വാസികള്‍ക്ക് എല്ലാവിധ സൗകര്യവുമൊരുക്കി കണയംകോട് കുട്ടോത്ത് ശ്രീ സത്യനാരായണ ക്ഷേത്രം. പുലര്‍ച്ചെ മുതല്‍ ഇവിടെയെത്തിയ വിശ്വാസികള്‍ സുഖലാല്‍ ശാന്തിയുടെ കാര്‍മികത്വത്തില്‍ ബലിതര്‍പ്പണ ചടങ്ങുകള്‍ പൂര്‍ത്തിയാക്കി.
പുലര്‍ച്ചെ രണ്ടുമണി മുതല്‍ തന്നെ ബലിതര്‍പ്പണ ചടങ്ങുകള്‍ തുടങ്ങിയിരുന്നു. ക്ഷേത്ര മോക്ഷതീരത്താണ് ചടങ്ങുകള്‍ നടന്നത്. പൊലീസ്, ഫയര്‍ഫോഴ്‌സ്, മെഡിക്കല്‍ സഹായം, ആംബുലന്‍സ് സൗകര്യം എന്നിവയും ഉറപ്പാക്കിയിരുന്നു.
ക്ഷേത്രത്തിന് സമീപത്തുനിന്നും മോക്ഷതീരത്തേക്കുള്ള വരികളിലൂടെയാണ് ബലിതര്‍പ്പണ കൗണ്ടറുകളിലേക്ക് ഭക്തജനങ്ങളെ കടത്തിവിട്ടത്. ബലിതര്‍പ്പണത്തിനുശേഷം കുളിക്കുന്നതിനുള്ള സൗകര്യവും ക്ഷേത്രം ഭാരവാഹികള്‍ ഏര്‍പ്പാട് ചെയ്തിരുന്നു. പിതൃക്കള്‍ക്കായി ചെയ്യുന്ന പ്രത്യേക വഴിപാടായ തിലഹോമം കഴിപ്പിക്കുന്നതിനും ക്ഷേത്രസന്നിധിയില്‍ സൗകര്യമൊരുക്കിയിരുന്നു.
