വടകര: ദേശീയ പാതയില്‍ കരിമ്പനപ്പാലത്ത് ചരക്കു വാഹനങ്ങള്‍ കൂട്ടിയിടിച്ച് ഒരാള്‍ മരിച്ചു. മറ്റൊരാൾക്ക് പരിക്കേറ്റു. ഇന്ന് രാവിലെ ആറുമണിയോടെയായിരുന്നു അപകടം. കരിമ്പനപ്പാലത്ത് പഴയ പെട്രോൾ പമ്പിന് സമീപത്ത് നിന്ന് തലശ്ശേരി ഭാഗത്ത് എത്തിയ പിക്കപ്പ് ലോറി എതിരെ വന്ന ലോറിയിൽ ഇടിക്കുകയായിരുന്നു. പിന്നാലെ മറ്റൊരു വാഹനത്തിലും ഇടിച്ചു.

പിക്കപ്പ് ലോറിയുടെ ഡ്രൈവർ സേലം സ്വദേശി രാജുവാണ് മരിച്ചത്. പരിക്കേറ്റയാളുടെ നില ഗുരുതരമാണ്. നാട്ടുകാരും ഫയർഫോഴ്സും അപകടത്തിൽപ്പെട്ടവരെ വടകര സഹകരണ ആശുപത്രിയിലേക്ക് മാറ്റി. ഗുരുതരമായി പരിക്കേറ്റയാളെ കോഴിക്കോട് ആശുപത്രിയിലേക്ക് മാറ്റി.

പിക്കപ്പ് ലോറിയുടെ മുന്‍ഭാഗം ഗ്യാസ്‌കട്ടര്‍ ഉപയോഗിച്ച് പൊളിച്ചാണ് പരിക്കേറ്റവരെ പുറത്തെടുത്തത്. വടകര പൊലീസ് സ്ഥലത്തെത്തി.