വടകര: കരിമ്പനപ്പാലത്തെ പെട്രോള്‍ പമ്പിന് നേരെ രണ്ടംഗ സംഘത്തിന്റെ ആക്രമണം. ജീവനക്കാരന് പരിക്കേറ്റു. ഇന്ത്യന്‍ ഓയില്‍ ഡീലര്‍ ആയ ജ്യോതി ഓട്ടോ ഫ്യൂയല്‍സിനെ നേരെയാണ് ആക്രമണം ഉണ്ടായത്. അയനിക്കാട് കമ്പിവളപ്പില്‍ വൈശാഖിനെ (24)ആണ് ആക്രമിച്ചത്.

തലയ്ക്കു പരിക്കേറ്റ വൈശാഖിനെ വടകര സഹകരണ ആശുപത്രിയില്‍ പ്രവേശിപ്പിച്ചു. ഞായറാഴ്ച രാത്രി 11:30 നാണ് സംഭവം.

ഞായറാഴ്ച രാത്രി 11 മണിയോടെ ബൈക്കുമായി എത്തിയ മൂന്നുപേര്‍ പെട്രോള്‍ നിറച്ചതിനുശേഷം പണം നല്‍കാതെ തര്‍ക്കത്തില്‍ ആവുകയായിരുന്നു. തുടര്‍ന്ന് പോയ സംഘത്തിലെ രണ്ടുപേര്‍ കല്ലുമായി വീണ്ടും എത്തി അക്രമം അഴിച്ചുവിടുകയായിരുന്നു.

വൈശാഖിനെ ആക്രമിക്കുകയും തുടര്‍ന്ന് ഗ്ലാസുകള്‍ തകര്‍ക്കുകയുമായിരുന്നു. ആക്രമണം സംബന്ധിച്ച് ജ്യോതി ഓട്ടോ ഫ്യൂയല്‍സ് അധികൃതര്‍ വടകര പോലീസില്‍ പരാതി നല്‍കിയിട്ടുണ്ട്.