കാക്കൂർ: ബസ് ശരീരത്തിലൂടെ കയറിയിറങ്ങി നന്മണ്ട സ്വദേശിയായ ബെെക്ക് യാത്രികൻ മരിച്ചു. നന്മണ്ട സ്വദേശി എ. ബിജോയ് ആണ് മരിച്ചത്. മുപ്പത്തിയൊമ്പത് വയസായിരുന്നു. ബൈക്കുകൾ തമ്മിൽ കൂട്ടിയിടിച്ചതിനെ തൂടർന്നാണ് ബിനോയ് ബസിനടിയിലേക്ക് തെറിച്ചുവീണത്. ശനിയാഴ്ച രാവിലെ എട്ടേമുക്കാലോടെ ബാലുശ്ശേരി- കോഴിക്കോട് പാതയ്ക്കിടയിൽ കാക്കൂർ പതിനൊന്നേ രണ്ടിലാണ് വാഹനാപകടം നടന്നത്.

നന്മണ്ടയിൽനിന്ന് കോഴിക്കോട് ഭാ​ഗത്തേക്ക് വരികയായിരുന്നു ബിജോയ്. ഇതേ സമയം എതിരെ വന്ന ബെെക്കുമായി കൂട്ടിയിടിക്കുകയായിരുന്നു. ബെെക്കുമായി കൂട്ടിയിടിച്ചതിന് പിന്നാലെ ബിനോയ് പിറകെ വന്ന സ്വകാര്യ ബസിന് അടിയിലേക്ക് തെറിച്ച് വീഴുകയായിരുന്നു. യുവാവിന്റെ ദേഹത്ത്കൂടെ ബസ് കയറി ഇറങ്ങിയാണ് മരണം സംഭവിക്കുന്നത്. എതിർദിശയിൽ വന്ന ബൈക്ക് യാത്രികനായ യുവാവിനെയും പരിക്കുകളോടെ കോഴിക്കോട് മെഡിക്കൽ കോളേജാശുപത്രിയിൽ പ്രവേശിപ്പിച്ചു.

നന്മണ്ട അമ്മോമ്മലത്ത് പരേതനായ വാസുവിന്റെയും വസന്തഅമ്മയുടെയുടെയും മകനാണ്. ഷിജി, സുബീഷ് എന്നിവർ സഹോദരങ്ങളാണ്. സി.പി.എം. നന്മണ്ട നോർത്ത് ലോക്കൽ കമ്മറ്റിയംഗവും, കെ .എസ്.കെ.ടി.യു. നന്മണ്ട വില്ലേജ് സെക്രട്ടറിയുമാണ് ബിനോയ്.