മേപ്പയ്യൂര്‍ സ്വദേശിനിയുടെ സ്‌കൂട്ടര്‍ കളവുപോയ സംഭവം; ഇരുപത്തിയാറുകാരന്‍ കോഴിക്കോട് പിടിയില്‍
മേപ്പയ്യൂര്‍: മേപ്പയ്യൂര്‍ സ്വദേശിനിയുടെ സ്‌കൂട്ടര്‍ മോഷ്ടിച്ച കേസില്‍ അത്തോളി കൊങ്ങന്നൂര്‍ സ്വദേശി പിടിയില്‍. ലിപിന്‍ (26) ആണ് നടക്കാവ് പൊലീസിന്റെ പിടിയിലായത്.
നഗരത്തില്‍ തിരക്കുള്ള ഭാഗങ്ങളില്‍ നിന്നും വ്യാപാര സ്ഥാപനങ്ങളുടെ പാര്‍ക്കിങ് ഏരിയകളില്‍ നിന്നും മോട്ടോര്‍വാഹനങ്ങള്‍ മോഷ്ടിക്കുന്നതാണ് ഇയാളുടെ രീതിയെന്ന് പൊലീസ് പറഞ്ഞു. കഴിഞ്ഞമാസം എരഞ്ഞിപ്പാലത്തുള്ള കലിക്കറ്റ് ട്രേഡ് സെന്ററിന്റെ മുന്‍വശത്ത് പാര്‍ക്കിങ് ഗ്രൗണ്ടില്‍ നിര്‍ത്തിയിട്ടിടത്തുനിന്നാണ് മേപ്പയ്യൂര്‍ സ്വദേശിനിയുടെ സ്‌കൂട്ടര്‍ മോഷ്ടിക്കപ്പെട്ടത്. സ്‌കൂട്ടര്‍ പ്രതിയില്‍ നിന്നും കണ്ടെടുത്തു.
നടക്കാവ് പൊലീസ് ഇന്‍സ്‌പെക്ടര്‍ പി.കെ.ജിജീഷിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ പിടികൂടിയത്. ഇയാള്‍ എലത്തൂര്‍ പൊലീസ് സ്റ്റേഷനില്‍ മയക്കുമരുന്ന് കേസില്‍ പ്രതിയായിട്ടുണ്ടെന്ന് പൊലീസ് പറഞ്ഞു.
എസ്.ഐ. ബിനുമോഹന്‍, എന്‍.ലീല, ബാബു പുതുശ്ശേരി, ശശികുമാര്‍, എം.വി.ശ്രീകാന്ത്, സജീവന്‍, റിജേഷ്, അബ്ദുള്‍ സമദ് എന്നിവര്‍ അന്വേഷണ സംഘത്തിലുണ്ടായിരുന്നു.