തിരുവന്തപുരം: റോക്കറ്റ് വേഗത്തില്‍ കുതിച്ച് സ്വര്‍ണ്ണവില. സംസ്ഥാന ചരിത്രത്തില്‍ ആദ്യമായി പവന്‍ വില 65,000 രൂപ നിലവാരം മറികടന്നു. പവന് 880 രൂപയും, ഗ്രാമിന് 110 രൂപയുമാണ് ഒറ്റയടിക്ക് വില കയറിയത്. ഇന്ന് ഒരു പവന്‍ സ്വര്‍ണ്ണത്തിന് 65,840 രൂപയും, ഗ്രാമിന് 8,230 രൂപയുമാണ് വില.

കേരളത്തിലെ വെള്ളി വിലയിലും ഇന്ന് വര്‍ധനയുണ്ട്. ഇന്നലെയും കേരളത്തില്‍ സ്വര്‍ണ്ണ വില ഉയര്‍ന്നിരുന്നു. പവന് 440 രൂപയും, ഗ്രാമിന് 55 രൂപയുമാണ് വില കയറിയത്. ഇന്നലെ ഒരു പവന്‍ സ്വര്‍ണ്ണത്തിന് 64,960 രൂപയും, ഗ്രാമിന് 8,120 രൂപയുമാണ് വില. ഇക്കഴിഞ്ഞ മൂന്ന് ദിവസങ്ങള്‍ കൊണ്ട് മാത്രം ഒരു പവന്‍ സ്വര്‍ണ്ണത്തിന് 1,680 രൂപയും, ഗ്രാമിന് 210 രൂപയുമാണ് കേരളത്തില്‍ വില വര്‍ധിച്ചിരിക്കുന്നത്. നിലവില്‍ കുറഞ്ഞ പണിക്കൂലിയായി 5% കണക്കാക്കിയാല്‍പ്പോലും, ജി.എസ്.ടിയും ഹാള്‍മാര്‍ക്കിങ് ചാര്‍ജ്ജുകളും അടക്കം ഒരു പവന്‍ സ്വര്‍ണ്ണത്തിന് 70,000 രൂപയ്ക്ക് മുകളില്‍ വില വരും.

സംസ്ഥാനത്തെ സ്വര്‍ണ്ണ വില ഈ മാസത്തെ താഴ്ന്ന നിലവാരങ്ങളിലെത്തിയത് മാര്‍ച്ച് 1 മുതല്‍ 3 വരെയുള്ള ദിവസങ്ങളിലായിരുന്നു. ഈ ദിവസങ്ങളില്‍ പവന് 63,520 രൂപയായിരുന്നു വില. ഇവിടെ നിന്ന് ഇതു വരെ, രണ്ടാഴ്ച്ച തികയുന്നതിന് മുമ്പ് ഒരു പവന്‍ സ്വര്‍ണ്ണത്തിന് 2,320 രൂപയും, ഗ്രാമിന് 290 രൂപയുമാണ് വില കൂടിയിരിക്കുന്നത്.

സംസ്ഥാനത്തെ വെള്ളി വിലയില്‍ ഇന്ന് വര്‍ധനയുണ്ട്. ഒരു കിലോ വെള്ളിക്ക് 100 രൂപ കൂടി 1,10,100 രൂപ എന്നതാണ് നിരക്ക്. ഒരു ഗ്രാം വെള്ളിക്ക് 110.10 രൂപ, 8 ഗ്രാമിന് 880.80 രൂപ, 10 ഗ്രാമിന് 1,101 രൂപ, 100 ഗ്രാമിന് 11,010 രൂപ എന്നിങ്ങനെയാണ് വില നിലവാരം.