സംസ്ഥാന വിവരാവകാശ കമ്മിഷൻ ജില്ലയിൽ ഫെബ്രുവരി ആറിന് തെളിവെടുപ്പ് നടത്തും. അറിയിപ്പ് ലഭിച്ചിട്ടുള്ള രണ്ടാം അപ്പീൽ ഹരജിക്കാരും,പൊതുവിവരാധികാരികളും ഒന്നാം അപ്പീൽ മേധാവികളും സംസ്ഥാന വിവരാവകാശ കമ്മിഷണർ എ.എ.ഹക്കിം മുമ്പാകെ ബന്ധപ്പെട്ട രേഖകളുമായി ഹാജരാകണം. ഓഫീസർമാർ തൽസ്ഥിതി വിവരണം കൂടി ഹാജരാക്കണം. കലക്ടറേറ്റ് കോൺഫറൻസ് ഹാളിൽ രണ്ടു മണിക്ക് തെളിവെടുപ്പ് ആരംഭിക്കും.

സംസ്ഥാന സാക്ഷരതാമിഷൻ അതോറിറ്റി നടത്തുന്ന പത്താംതരം തുല്യതാ കോഴ്സിന്റെ 17-ാം ബാച്ചിലേക്കും (2023-24,) ഹയർ സെക്കണ്ടറി തുല്യതാ കോഴ്സിന്റെ 8-ാം ബാച്ചിലേക്കും (2023-25) ഓൺലൈൻ രജിസ്ട്രേഷൻ ആരംഭിച്ചു. മാർച്ച് 15 വരെ അപേക്ഷിക്കാം. ഹയർസെക്കണ്ടറി തുല്യത കോഴ്സിൽ ഹ്യൂമാനിറ്റീസ്, കൊമേഴ്സ് വിഭാഗങ്ങളിലാണ് തുല്യതാ പഠനം. ഹയർസെക്കണ്ടറി തുല്യതയ്ക്ക് ഒന്നാം വർഷം 2600/-രൂപയും, പത്താം തരം തുല്യതയ്ക്ക് 1950/- രൂപയുമാണ് ഫീസ്. പട്ടികജാതി /പട്ടിക വർഗ്ഗ / ട്രാൻസ്ജെന്റർ/ ഭിന്നശേഷി വിഭാഗക്കാർക്ക് രേഖകൾ ഹാജരാക്കിയാൽ കോഴ്സ് ഫീസ് സൗജന്യമാണ്.

പത്താംതരം തുല്യതയ്ക്ക് ചേരുന്നതിന് കുറഞ്ഞ പ്രായപരിധി 17 വയസ്സും, ഹയർസെക്കണ്ടറി തുല്യതയ്ക്ക് 22 വയസ്സുമാണ്. പത്താം തരം പ്രവേശനത്തിന് ഏഴാം ക്ലാസ്സും, ഹയർസെക്കണ്ടറിക്ക് പത്താം തരംവും വിജയിച്ചിരിക്കണം. ഉയർന്ന പ്രായപരിധിയില്ല. ഞായറാഴ്ചകളിലും പൊതു അവധി ദിവസങ്ങളിലും നടത്തുന്ന സമ്പർക്ക പഠന ക്ലാസ്സുകളിൽ പങ്കെടുത്ത് പഠനം പൂർത്തീകരിക്കുന്നവർക്ക് പൊതുവിദ്യാഭ്യാസ വകുപ്പ് നടത്തുന്ന പത്താം തരം തുല്യതാ പരീക്ഷയും ഹയർസെക്കണ്ടറി ബോർഡ് നടത്തുന്ന ഹയർസെക്കണ്ടറി തുല്യതാ പരീക്ഷയും എഴുതാം. വിജയിക്കുന്നവർക്ക് പി.എസ്.സി. അംഗീകരിക്കുന്ന തുടർ പഠനത്തിന് അർഹതയുള്ള സർട്ടിഫിക്കറ്റുകൾ നൽകും.

കുടുംശ്രീ, ആശാവർക്കർ, തൊഴിലുറപ്പ്, തുടങ്ങിയ വിഭാഗങ്ങളിലെ അംഗങ്ങൾക്കും അവസരം പ്രയോജനപ്പെടുത്താം. ട്രാൻസ്ജെന്റർ വിഭാഗത്തിന് സ്കോളർഷിപ്പ് അനുവദിക്കും.പത്താംതരം, ഹയർസെക്കണ്ടറി തുല്യത കോഴ്സിന് പുറമേ സാക്ഷരത, നാലാംതരം, ഏഴാംതരം കോഴ്സുകളിലേക്കും ഓൺലൈനായി രജിസ്റ്റർ ചെയ്യാം. സാക്ഷരതാ പ്രേരക്മാർ വഴിയാണ് രജിസ്ട്രേഷൻ നടത്തേണ്ടത്. www.literacymissionkerala.org എന്ന സൈറ്റിൽ നിന്നും ഫീസ് അടക്കാനുള്ള ചെലാൻ ഡൗൺലോഡ് ചെയ്ത് തുക എസ്.ബി. ഐ ബാങ്കിൽ അടച്ച ശേഷം kslma.keltron.in എന്ന സൈറ്റിലൂടെയും ഓൺലൈൻ രജിസ്ട്രേഷൻ നടത്താം. പ്രിന്റ ഔട്ട് ചെലാൻ, സർട്ടിഫിക്കറ്റുകളുടെ കോപ്പി എന്നിവ സിവിൽ സ്റ്റേഷനിൽ പ്രവർത്തിക്കുന്ന ജില്ലാ സാക്ഷരതാമിഷൻ ഓഫീസിലോ, തദ്ദേശ സ്വയംഭരണസ്ഥപനങ്ങളിൽ പ്രവർത്തിക്കുന്ന വികസന/തുടർവിദ്യാകേന്ദ്രങ്ങളിലോ ഹാജരാക്കി രജിസ്ട്രേഷൻ അപ്രൂവൽ നേടണം. കൂടുതൽ വിവരങ്ങൾക്ക്: 04952370053

ജില്ലയിലെ 69 സ്കൂളുകളിൽ ചുറ്റുമതിലുകൾ നിർമ്മിച്ച് സുരക്ഷിതത്വം ഒരുക്കാൻ സമഗ്ര ശിക്ഷയുടെ പദ്ധതി. ഇതിനായി 5.5 കോടി രൂപ ഉടൻ അനുവദിക്കുമെന്ന് ജില്ലാ പ്രോജക്ട് കോ ഓർഡിനേറ്റർ ഡോ. എ. കെ അബ്ദുൾഹക്കിം അറിയിച്ചു. ടോയ്ലറ്റ് നിർമ്മാണം, സ്കൂൾ കെട്ടിട നവീകരണം, കുട്ടികൾക്ക് ശുദ്ധമായ കുടിവെള്ളം ഉറപ്പാക്കൽ എന്നീ പദ്ധതികൾക്കും ലഭ്യത അനുസരിച്ച് ഫണ്ട് അനുവദിക്കും.

ജില്ലയിലെ മുഴുവൻ അംഗീകൃത പ്രീ- പ്രൈമറികളും ശിശു സൗഹൃദ ക്ലാസ്സ് മുറികളും കളി ഉപകരണങ്ങളും കൊണ്ട് സമ്പന്നമാക്കുന്ന ബിഎഎൽഎ (ബിൽഡിംഗ് ആസ് എ ലേർണിംഗ് എയിഡ് ) പദ്ധതിയുടെ ഭാഗമായി 2 കോടി 80 ലക്ഷം രൂപയും അനുവദിച്ചിട്ടുണ്ട്. 28 പ്രീ- പ്രൈമറി സ്കൂളുകൾക്ക് 10 ലക്ഷം രൂപ വീതമാണ് അനുവദിച്ചിട്ടുള്ളത്. ഇതോടെ ജില്ലയിലെ 45 പ്രീ- പ്രൈമറികൾ ഹൈടെക് ആയി മാറുമെന്നും ജില്ലാ പ്രോജക്ട് കോ- ഓർഡിനേറ്റർ അറിയിച്ചു. 17 സ്കൂളുകൾക്ക് 10 ലക്ഷം രൂപ വീതം കഴിഞ്ഞ വർഷം അനുവദിച്ചതിന് പുറമെയാണ് 28 സ്കൂളുകളെ കൂടി ഈ വർഷം പദ്ധതിയുടെ ഭാഗമാക്കിയത്.

ജില്ലയിൽ ചെറുവണ്ണൂർ ഗ്രാമപഞ്ചായത്തിലെ വാർഡ് നമ്പർ 15 കക്കറമുക്ക് ഡിവിഷനിൽ ഫെബ്രുവരി 28ന് ഉപതെരഞ്ഞെടുപ്പ് നടക്കും. സ്ത്രീ സംവരണ വാർഡാണ് കക്കറമുക്ക്.

ഉപതിരഞ്ഞെടുപ്പിന് നാമ നിർദ്ദേശ പട്ടിക സമർപ്പിക്കാനുള്ള അവസാന തിയ്യതി ഫെബ്രുവരി ഒൻപതാണ്. ഫെബ്രുവരി പത്തിന് നാമനിർദ്ദേശ പത്രികയുടെ സൂക്ഷ്മ പരിശോധന നടത്തും. സ്ഥാനാർത്ഥിത്വം പിൻവലിക്കാനുള്ള അവസാന തിയ്യതി ഫെബ്രുവരി 13 ആണ്.

പോളിംഗ് സാമഗ്രികളുടെ വിതരണം ഫെബ്രുവരി 27ന് നടത്തും. മാർച്ച് 1 ന് രാവിലെ 10 മണി മുതൽ വോട്ടെണ്ണൽ ആരംഭിക്കും.

ജില്ലയിൽ ഉപതിരഞ്ഞെടുപ്പുമായി ബന്ധപ്പെട്ട് ഡെപ്യൂട്ടി കലക്ടർ കെ ഹിമയുടെ അധ്യക്ഷതയിൽ യോഗം ചേർന്നു. ഉപതിരഞ്ഞെടുപ്പുമായി ബന്ധപ്പെട്ട് പ്രാദേശിക രാഷ്ട്രീയ പാർട്ടി പ്രതിനിധികളുടെ യോഗം ഉടൻ വിളിച്ചു ചേർക്കാൻ വരണാധിക്കാരിക്ക് നിർദേശം നൽകി. നോമിനേഷൻ വിവരങ്ങൾ ജില്ലാ തിരഞ്ഞെടുപ്പ് ഓഫീസർക്ക് ലഭ്യമാക്കും. ഉപതിരഞ്ഞെടുപ്പിൽ ക്രമസമാധാന പാലനം ഉറപ്പുവരുത്തുന്നതിനായി ജില്ലാ റൂറൽ പോലീസ് മേധാവിക്ക് നിർദ്ദേശം നൽകുമെന്നും ഡെപ്യൂട്ടി കലക്ടർ അറിയിച്ചു.

ചെറുവണ്ണൂർ കക്കറമുക്കിലെ അൽ അമീൻ പബ്ലിക് സ്കൂളിൽ രണ്ട് പോളിംഗ് സ്റ്റേഷനുകൾ ക്രമീകരിക്കും. പോളിംഗ് വിതരണ- സ്വീകരണ -സ്ട്രോങ്ങ് റൂമും വോട്ടെണ്ണൽ കേന്ദ്രവും ചെറുവണ്ണൂരിലെ ഫിസിയോതെറാപ്പി സെന്ററാണ്.

യോഗത്തിൽ എ ഇ ഒ ഓഫീസ് മേലടിയിലെ സീനിയർ സൂപ്രണ്ടും വരണാധികാരിയുമായ ഷാജു എ.ജി, ചെറുവണ്ണൂർ ഗ്രാമ പഞ്ചായത്ത്‌ സെക്രട്ടറിയും ഉപവരണാധികാരിയായ രാമചന്ദ്രൻ എം തുടങ്ങിയവർ പങ്കെടുത്തു.