താമരശ്ശേരി: പത്തുവയസുകാരനെ ലൈംഗികമായി പീഡിപ്പിച്ചെന്ന കേസില്‍ താമരശ്ശേരിയില്‍ മൂന്നുപേര്‍ അറസ്റ്റില്‍. കരിഞ്ചോല നെരോംപാറമ്മല്‍ എന്‍.പി.ബഷീര്‍ (55), കരിഞ്ചോല സ്വഹാബ് (18), കരിഞ്ചോല മുഹമ്മദ് റാഷിദ് (18) എന്നിവരെയാണ് അറസ്റ്റ് ചെയ്തത്.

ആറുകേസുകളിലായി ഏഴുപേര്‍ പീഡിപ്പിച്ചെന്നാണ് പരാതി. ഇതില്‍ മൂന്നുപേര്‍ പ്രായപൂര്‍ത്തിയാകാത്തവരാണ്. ഇവര്‍ക്കായി പൊലീസ് അന്വേഷണം തുടങ്ങി.

കൗണ്‍സിലിങ്ങിനിടെയാണ് കുട്ടി ഇക്കാര്യം വെളിപ്പെടുത്തിയത്. തുടര്‍ന്ന് ചൈല്‍ഡ് ലൈനിലും കുട്ടിയുടെ ബന്ധുക്കളെയും വിവരം അറിയിക്കുകയായിരുന്നു. ഇതേത്തുടര്‍ന്ന് താമരശ്ശേരി പൊലീസില്‍ ലഭിച്ച പരാതിയുടെ അടിസ്ഥാനത്തിലാണ് അറസ്റ്റ് നടന്നത്. കേസില്‍ ഉള്‍പ്പെട്ട ചില പ്രതികള്‍ ഒരു വര്‍ഷത്തോളമായി പലതവണ കുട്ടിയെ പീഡനത്തിന് ഇരയാക്കിയെന്നാണ് കുട്ടി മൊഴിനല്‍കിയത്.