പേരാമ്പ്ര: ചേനോളി കണ്ണമ്പത്ത് പാറ ശ്രീ കരിയാത്തന്‍ ക്ഷേത്രത്തിലെ പ്രധാന ഭണ്ഡാരം കുത്തിത്തുറന്ന് മോഷണം. ക്ഷേത്ര ജീവനക്കാരനായ ഒ.എം.രാജീവന്‍ തിങ്കളാഴ്ച സന്ധ്യയ്ക്ക് വിളക്ക് തെളിയിക്കാന്‍ എത്തിയപ്പോഴാണ് ഭണ്ഡാരം തകര്‍ന്നു കിടക്കുന്നതായി കണ്ടത്.

ക്ഷേത്രത്തിലെ തിറ മഹോത്സവം ഏഴാം തിയ്യതിയാണ് സമാപിച്ചത്. ഇതോടനുബന്ധിച്ച് ഏകദേശം ഒന്നേകാല്‍ ലക്ഷം രൂപയോളം ഭണ്ഡാര വരവുണ്ടായിരിക്കുമെന്നാണ് അനുമാനം. ക്ഷേത്രത്തിന്റെ മുന്നില്‍ തറയില്‍ വെച്ചിരുന്ന ഭണ്ഡാരം എടുത്ത് ഓഫീസിന് സമീപത്തുവെച്ച് നിലത്തിട്ട് പൂട്ട് തകര്‍ക്കുകയായിരുന്നു.

ക്ഷേത്രം മാനേജിങ് ട്രസ്റ്റി ബാലകൃഷ്ണന്‍ ചേനോളി നല്‍കിയ പരാതിയില്‍ പേരാമ്പ്ര പൊലീസ് കേസെടുത്ത് അന്വേഷണമാരംഭിച്ചു. പേരാമ്പ്ര പൊലീസ് ഇന്‍സ്‌പെക്ടര്‍ പി.ജംഷീദിന്റെ നേതൃത്വത്തില്‍ പൊലീസ് സംഘം സ്ഥലത്തെത്തി പരിശോധന നടത്തി.

ക്ഷേത്രത്തില്‍ മലയാള മാസത്തിലെ ഒന്നാം തീയതി വൈകുന്നേരത്തെ പൂജയും വാര്‍ഷിക ഉത്സവവുമാണ് പതിവായുണ്ടാവാറുള്ളത്.

Summary: theft in Sree Kariyathan Temple in Chenoli, Perambra