ചെങ്ങോട്ടുകാവിലെ ആക്രമണ കേസുമായി ബന്ധപ്പെട്ട് അറസ്റ്റ് ചെയ്ത പ്രതികളെ റിമാന്‍ഡ് ചെയ്തു
കൊയിലാണ്ടി: ചെങ്ങോട്ടുകാവിലെ ആക്രമണ കേസുമായി ബന്ധപ്പെട്ട് അറസ്റ്റ് ചെയ്ത പ്രതികളെ റിമാന്‍ഡ് ചെയ്തു. ഇന്നലെ രാത്രി കോടതിയില്‍ ഹാജരാക്കിയ പ്രതികളെ പതിനാല് ദിവസത്തേയ്ക്കാണ് റിമാന്‍ഡ് ചെയ്തത്.
ചെങ്ങോട്ടുകാവിലെ വാഹനാപകടക്കേസായി അവസാനിക്കുമായിരുന്ന സംഭവം കുറ്റമറ്റ അന്വേഷണത്തിലൂടെ ആക്രമണക്കേസാണെന്ന് കൊയിലാണ്ടി പൊലീസ് തെളിയിക്കുകയായിരുന്നു. ഇതുമായി ബന്ധപ്പെട്ട് ഏഴുകുടിക്കല്‍ ഭാഗത്തുള്ള മനീഷ്, മിഥുന്‍ എന്നിവര്‍ക്കെതിരെ 118 (3) ബി.എന്‍.എസ്, 3 (5) ബി.എന്‍.എസ് പ്രകാരം കേസെടുത്തിട്ടുണ്ട്.
ആഗസ്റ്റ് നാലിന് രാത്രി ഒമ്പതുമണിയോടെ ചെങ്ങോട്ടുകാവ് ഓവര്‍ ബ്രിഡ്ജിന് സമീപമുള്ള പഴയ ദേശീയപാതയില്‍ വാഹനാപകടം എന്ന തരത്തില്‍ പൊലീസിന് ലഭിച്ച പരാതിയാണ് അന്വേഷണത്തിലൂടെ പുതിയ വഴിത്തിരിവിലെത്തിച്ചത്. ചെങ്ങോട്ടുകാവില്‍ മത്സ്യക്കച്ചവടം ചെയ്തുവരുന്ന പുതിയോട്ടില്‍ എടക്കുളം സാദത്തിന്റെ ഗുരുതരാവസ്ഥയില്‍ പാലത്തിന് സമീപം കണ്ടെത്തുകയായിരുന്നു.
തലയ്ക്ക് ഗുരുതരമായി പരിക്കേറ്റ ഇയാളെ കോഴിക്കോട് മെഡിക്കല്‍ കോളേജില്‍ പ്രവേശിപ്പിക്കുകയും ചെയ്തു. വാഹനാപകടക്കേസ് രജിസ്റ്റര്‍ ചെയ്ത് അന്വേഷണം നടത്തവേയാണ് സാദത്തിനെ രണ്ടുപേര്‍ ചേര്‍ന്ന് ആക്രമിച്ചതാണെന്ന് പൊലീസിന് വ്യക്തമായത്.
വാക്ക് തര്‍ക്കത്തെ തുടര്‍ന്ന് മനീഷും മിഥുനും ചേര്‍ന്ന് സാദത്തിനെ ആക്രമിച്ച് ഗുരുതരമായി പരിക്കേല്‍പ്പിച്ചതാണെന്നാണ് പൊലീസിന്റെ കണ്ടെത്തല്‍. കൊയിലാണ്ടി എസ്.എച്ച്.ഒ കെ.എസ്.ജിതേഷിന്റെ നേതൃത്വത്തില്‍ എസ്.ഐ.മാരായ മനോജ്, ഗിരീഷ് കെ.പി എന്നിവരുടെ സമയോചിതമായ ഇടപെടലാണ് പ്രതികളിലേക്കെത്താന്‍ സഹായകമായത്. ശാസ്ത്രീയമായ അന്വേഷണത്തിലൂടെയാണ് കേസിന്റെ ചുരുളഴിച്ചത്.