അഞ്ച് വര്‍ഷത്തെ പ്രവര്‍ത്തന മികവില്‍ നന്തിയിലെ സുകൃതം റസിഡന്‍സ് അസോസിയേഷന്‍; പുതുവര്‍ഷ ആഘോഷത്തിനൊപ്പം ആമ്പിച്ചിക്കാട്ടിലെയും സമീപത്തെയും പ്രതിഭകളെ ആദരിക്കലും
നന്തി ബസാര്‍: ഇരുപതാം മൈല്‍ ആമ്പിച്ചിക്കാട് സുകൃതം റസിഡന്‍സ് അസോസിയേഷന്റെ ആഞ്ചാം വാര്‍ഷികവും പുതുവര്‍ഷ ആഘോഷവും വിപുലമായ പരിപാടികളോടെ നടന്നു. ആഘോഷ പരിപാടികള്‍ മൂടാടി ഗ്രാമപഞ്ചായത്ത് പ്രസിഡന്റ് സി.കെ.ശ്രീകുമാര്‍ ഉദ്ഘാടനം ചെയ്തു.
വാര്‍ഡ് മെമ്പര്‍ ഉസ്‌ന എ.വി അധ്യക്ഷയായിരുന്നു. ഡോ: സോമന്‍ കടലൂര്‍ മുഖ്യാതിഥിയായ ചടങ്ങില്‍ പാലിയേറ്റീവ് പ്രവര്‍ത്തകരായ യൂസഫ് ചങ്ങരോത്ത്, കെ.ബഷീര്‍ മാസ്റ്റര്‍, യുവകവയത്രിയായ ജസീറനിസാര്‍ കുറ്റിക്കാട്ടില്‍, കര്‍ഷക അവാര്‍ഡ് നേടിയ സത്യന്‍ ആമ്പിച്ചിക്കാട്ടില്‍, ക്ഷീരകര്‍ഷക അവര്‍ഡ് നേടിയ ഷാജി പാലുകുറ്റിക്കുനി,
നാടക നടന്മാരായ ശ്രീജിത്ത് കാട്ടില്‍, സനല്‍ കെ.വി എന്നിവരെയും, വിദ്യഭ്യാസ രംഗത്തും മറ്റ് മേഖലയിലും മികവ് തെളിച്ച വിദ്യാര്‍ത്ഥികളെയും ആദരിച്ചു.
ബ്ലോക്ക് മെമ്പര്‍ കെ. ജീവാനന്ദന്‍ മാസ്റ്റര്‍ ആശംസ അര്‍പ്പിച്ച് സംസാരിച്ച ചടങ്ങിന് റസിഡന്‍സ് അസോസിയേഷന്‍ സെക്രട്ടറി സത്യന്‍ ആമ്പിച്ചിക്കാട്ടില്‍ സ്വാഗതവും, പ്രസിഡന്റ് നിയാസ് പാലുകുറ്റി നന്ദിയും പറഞ്ഞു.