പേരാമ്പ്ര: ചേനായിറോഡിലുള്ള റോയല്‍ സ്റ്റോണ്‍ മാര്‍ബിള്‍സ് കടയിലെ സെയില്‍സ് ഗേളിനെ വീട്ടില്‍ തടങ്കലില്‍വെച്ച് മര്‍ദിച്ചെന്ന പരാതിയില്‍ കടയുടമ റിമാന്റില്‍. കല്ലോട് കുരിയാടി ജാഫറി(35)നെയാണ് പേരാമ്പ്ര കോടതി റിമാന്‍ഡ് ചെയ്തത്. ഉള്ളിയേരി കക്കഞ്ചേരി സ്വദേശിനിയെ മര്‍ദിച്ചെന്ന പരാതിയില്‍ ബുധനാഴ്ച്ചയാണ് ഇയാളെ പോലീസ് അറസ്റ്റു ചെയ്തത്.

ചൊവ്വാഴ്ച്ച വൈകീട്ട് കടയിലെ സെയില്‍സ് ഗേളായ യുവതിയെ കടയോടടുത്തുള്ള വീട്ടിലേക്ക് കൊണ്ടുപോയി ക്രൂരമായി മര്‍ദ്ദിച്ചുവെന്നാണ് പരാതി. ചൊവ്വാഴ്ച്ച രാത്രിയോടെ പോലീസും ബന്ധുക്കളും എത്തിയാണ് യുവതിയെ വീട്ടില്‍ നിന്നും കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റിയത്. ജോലിയുമായി ബന്ധപ്പെട്ട സാമ്പത്തിക തര്‍ക്കങ്ങള്‍ ഉണ്ടായിരുന്നുവെന്ന് യുവതിയുടെ മൊഴിയില്‍ പറഞ്ഞിരുന്നു.

സംഭവത്തില്‍ ജാഫറിന്റെ ഉപ്പ ഇബ്രാഹിമിന്റെ പേരിലും ഉമ്മ ഖദിജയുടെ പേരിലും കേസെടുത്തിട്ടുണ്ടെന്ന് പോലീസ് പറഞ്ഞു.