കേരളാ സൈക്കിള്‍ റൈഡിന് ജനുവരി 21ന് കൊയിലാണ്ടിയില്‍ സ്വീകരണം; പെനാല്‍ട്ടി ഷൂട്ടൗട്ട് മത്സരം സംഘടിപ്പിച്ച് ആര്‍.വൈ.എഫ്
കൊയിലാണ്ടി: ആര്‍.വൈ.എഫിന്റെ നേതൃത്വത്തില്‍ നടക്കുന്ന ‘കേരളാ സൈക്കിള്‍ റൈഡിന്’ ജനുവരി 21ന് കൊയിലാണ്ടിയില്‍ സ്വീകരണം നല്‍കുന്നു. ജനുവരി 19ന് ആരംഭിച്ച സൈക്കിള്‍ റൈഡ് ജനുവരി 29 സെക്രട്ടറിയേറ്റിന് മുന്നില്‍ അവസാനിക്കും. ആര്‍.വൈ.എഫ് സംസ്ഥാന സെകട്ടറി അഡ്വ. വിഷ്ണുമോഹനും പ്രസിഡണ്ട് ഉല്ലാസ് കോവൂരുമാണ് റൈഡിന് നേതൃത്വം നല്‍കുന്നത്.
ഇതിന്റെ മുന്നോടിയായി കൊയിലാണ്ടിയിലെ പ്രമുഖ ഫുട്‌ബോള്‍ ടീമുകള്‍ പങ്കെടുത്ത പെനാല്‍ട്ടി ഷൂട്ടൗട്ട് മത്സരം സംഘടിപ്പിച്ചു. മത്സരം ആര്‍.വൈ.എഫ് കോഴിക്കോട് ജില്ലാ ജോ-സെക്രട്ടറി അക്ഷയ് പൂക്കാട് ഉദ്ഘാടനം ചെയ്തു. എം.വൈ.എല്‍ ചേമഞ്ചേരി വിന്നേഴ്‌സ് ട്രോഫിയും അമിഗോസ് പുളിയഞ്ചേരി റണ്ണേഴ്‌സ് അപ്പും കരസ്ഥമാക്കി.
പഴയ കാല ഫുട്‌ബോള്‍ താരവും പരിശീലകനുമായ എം.കെ മോഹന്‍ദാസ് ജേതാക്കള്‍ക്ക് മെഡലുകളും ട്രോഫിയും സമ്മാനിച്ചു. റഷീദ് പുളിയഞ്ചേരി, ജ്യോതികുമാര്‍, വത്സന്‍ തുളിപ്പ്, എന്‍.കെ.മുഹമ്മദ് റാഷിദ് എന്നിവര്‍ മത്സരത്തിന് നേതൃത്വം നല്‍കി.