94 വിദ്യാര്‍ത്ഥികള്‍ക്ക് ബിരുദം നല്‍കുന്നു; പുറക്കാട് ദാറുല്‍ ഖുര്‍ആന്‍ പതിനൊന്നാം വാര്‍ഷികവും കോണ്‍വൊക്കേഷനും ജനുവരി 11ന്
കൊയിലാണ്ടി: പുറക്കാട് ദാറുല്‍ ഖുര്‍ആന്‍ വാര്‍ഷികവും ബിരുദദാന സമ്മേളനവും നാളെ നടക്കും. സ്ഥാപനത്തില്‍ നിന്നും ഖുര്‍ആന്‍ മനപാഠമാക്കിയവരും ദഅവ കോഴ്‌സ് പൂര്‍ത്തിയാക്കുകയും ചെയ്ത 48 വിദ്യാര്‍ത്ഥി വിദ്യാര്‍ത്ഥിനികള്‍ ഹിഫ്‌ള് പൂര്‍ത്തിയാക്കിയ 46 വിദ്യാര്‍ത്ഥി വിദ്യാര്‍ത്ഥിനികളുമുള്‍പ്പെടെ 94 വിദ്യാര്‍ത്ഥികള്‍ക്കാണ് ബിരുദം നല്‍കുന്നത്. വെള്ളിയാഴ്ച രാത്രി 7.30 ന് നടക്കുന്ന പൂര്‍വ്വ വിദ്യാര്‍ത്ഥി സംഗമംദാറുല്‍ ഖുര്‍ആന്‍ അസി: ഡയരക്ടര്‍ വി.എം.അഷ്‌റഫ് മൗലവി ഉദ്ഘാടനം ചെയ്യും.
പൂര്‍വ്വ വിദ്യാര്‍ത്ഥി സംഘടന പ്രസിഡണ്ട് മുഹമ്മദലി അധ്യക്ഷത വഹിക്കും. പ്രിന്‍സിപ്പല്‍ സുലൈമാന്‍ ഖാസിമി ആമുഖ പ്രഭാഷണം നിര്‍വ്വഹിക്കും. പൂര്‍വ്വ വിദ്യാര്‍ത്ഥി പ്രതിനിധികളും കമ്മിറ്റി ഭാരവാഹികളും സംസാരിക്കും. ശനിയാഴ്ച രാവിലെ 6.30 ന് നടക്കുന്ന ഉദ്ഘാടന സംഗമം പ്രമുഖ പണ്ഡിതന്‍ മുഹമ്മദ് ഹുസൈന്‍ സഖാഫി ഉദ്ഘാടനം ചെയ്യും. കമ്മിറ്റി വൈസ് പ്രസിഡണ്ട് അബൂബക്കര്‍ കൗസര്‍ അദ്ധ്യക്ഷത വഹിക്കും.
കെ.പി അസൈനാര്‍ മാസ്റ്റര്‍, സുലൈമാന്‍ ഖാസിമി, സിറാജ്.കെ എന്നിവര്‍ സംസാരിക്കും. രാവിലെ 10 മണിക്ക് വിശുദ്ധ ഖുര്‍ആനും സാമൂഹ്യ പരിവര്‍ത്തനവും എന്ന വിഷയത്തില്‍ നടക്കുന്ന അക്കാഡമിക് സെമിനാര്‍ പ്രമുഖ പണ്ഡിതനും നിരവധി അറബിഗ്രന്ഥങ്ങളുടെ രചയിതാവുമായ ഡോ അബ്ദുന്ന സ്വീര്‍ അല്‍ മലൈബാരി ഉദ്ഘാടനം ചെയ്യും. ദാറുല്‍ ഖുര്‍ആന്‍ ഡയരക്ടര്‍ ഹബീബ് മസ്ഊദ് അധ്യക്ഷത വഹിക്കുന്ന യോഗത്തില്‍ കേരള മുസ്ലിം നവോത്ഥാനത്തില്‍ ഖുര്‍ആനിന്റെ സ്വാധീനം എന്ന വിഷയം കെ.എന്‍.എം മര്‍കസുദ്ദഅവ സംസ്ഥാന സെക്രട്ടറി ഡോ ജാബിര്‍ അമാനിയും ഖുര്‍ആന്‍ ഗവേഷണ പഠനം സാമൂഹിക നവോത്ഥാനത്തിന്റെ ശക്തി ശ്രോതസ് എന്ന വിഷയം ഇത്തിഹാദുല്‍ ഉലമ കേരള സെക്രട്ടറി സമീര്‍ കാളികാവും അവതരിപ്പിക്കും.
ദാറുഖുര്‍ആന്‍ കമ്മിറ്റി പ്രസിഡണ്ട് സമാപന പ്രസംഗം നിര്‍വ്വഹിക്കും. അഷ്‌റഫ് മൗലവി, ഷക്കീര്‍.എ.എം എന്നിവര്‍ സംസാരിക്കും. ഉച്ചക്ക് രണ്ട് മണിക്ക് നടക്കുന്ന കുടുംബ സംഗമം മഹല്ല് പ്രസിഡണ്ട് വി.വി.ജബ്ബാര്‍ ഉദ്ഘാടനം ചെയ്യും. സ്വാഗത സംഘം ചെയര്‍മാന്‍ പി.എം.അബ്ദുല്‍ ഖാദര്‍ അധ്യക്ഷത വഹിക്കും. വിവിധ വിഷയങ്ങളില്‍ ബഷീര്‍ മുഹിയിദീന്‍ സൈക്കോളജിസ്റ്റ് ഡോ: ശറഫുദ്ദീന്‍ കടമ്പോട്ട് എന്നിവര്‍ പഠന ക്ലാസുകള്‍ നടത്തും. മുഹമ്മദ് ഷിയാസ്, റസാഖ് എളവന എന്നിവര്‍ സംസാരിക്കും.
വൈകുന്നേരം 4:30 ന് നടക്കുന്ന ബിരുദദാനവും സമാപന സമ്മേളനവും ജമാഅത്തെ ഇസ്ലാമി കേന്ദ്ര മജ്‌ലിസ് ശുറാ അംഗം എം.ഐ.അബ്ദുല്‍ അസീസ് ഉദ്ഘാടനം ചെയ്യും. വിദ്യാസദനം ട്രസ്റ്റ് ചെയര്‍മാന്‍ യു.പി.സിദ്ദീഖ് അധ്യക്ഷത വഹിക്കും. അഖിലേന്ത്യമുസ്ലിം പേഴ്‌സണല്‍ ലോ ബോര്‍ഡ് അംഗംമൗലാനാ അബ്ദുശുകൂര്‍ ഖാസിമി മുഖ്യപ്രഭാഷണം നടത്തും. മുസ്ലിംലീഗ് നേതാവ് സി.എച്ച് ഇബ്രാഹിം കുട്ടി മുഖ്യാതിഥിയായി സംബന്ധിക്കും. ദശ വാര്‍ഷിക സ്മരണിക വി.വി.ഗഫൂറിന് നല്‍കി.
ടി.സി.കെ അഹ്‌മദ് പ്രകാശനം ചെയ്യും ജമാഅത്തെ ഇസ്ലാമി ജില്ലാ പ്രസിഡണ്ട് ഫൈസല്‍ പൈങ്ങോട്ടായി വിസ്ഡം ഗ്ലോബല്‍ ഇസ്ലാമിക് ഓര്‍ഗനൈസേഷന്‍ ജില്ലാ പ്രസിഡണ്ട് ടി.പി.അബ്ദുല്‍ അസീസ് കമ്മിറ്റി ജനറല്‍ സെക്രട്ടറി ടി.പി നാസര്‍ സ്വാഗതസംഘം ചെയര്‍മാന്‍ പി.എം അബ്ദുല്‍ ഖാദര്‍, പി.ടി.എ പ്രസിഡണ്ട് ഖമര്‍ ജമാല്‍, ട്രസ്റ്റ് ജന സെക്രട്ടറി കെ.കെ.നാസര്‍, കെ.ആയിശ ടീച്ചര്‍, സജദ, മുജീബ്, സി.അബ്ദുറഹ്‌മാന്‍, ശരീഫ് നരിപ്പറ്റ ഡോ: സുഷി ഹസന്‍, പി.എം.അബ്ദുസ്സലാം ഹാജി, കെ.ഇമ്പിച്ചി അലി, പി.ടി.ഹനീഫ ഹാജി, പി.വി.ഇബ്രാഹിം മാസ്റ്റര്‍, പി.കെ.അബ്ദുല്ല, വി.കെ.അബ്ദുല്ലത്തീഫ്, ബഷീര്‍ മുഹിയിദീന്‍, ഹബീബ്മസ് ഊദ് എന്നിവര്‍ സംസാരിക്കും. ദാറുല്‍ ഖുര്‍ആന്‍ വിദ്യാര്‍ത്ഥികള്‍ അവതരിപ്പിക്കുന്ന ഖയാല്‍ ദൃശ്യാവിഷ്‌കാരത്തോടെ പരിപാടി സമാപിക്കും.
വാര്‍ത്താസമ്മേളനത്തില്‍ ദാറുല്‍ ഖുര്‍ആന്‍ അസിസ്റ്റന്റ് ഡയറക്ടര്‍ വി.എം.അഷ്‌റഫ് മൗലവി, സ്വാഗതസംഘം ചെയര്‍മാന്‍ ഖാദര്‍ പരപ്പലകം, ദാറുല്‍ ഖുര്‍ആന്‍ മാനേജര്‍ കെ.കെ.സിറാജ്, പ്രചരണ വകുപ്പ് കണ്‍വീനര്‍ മുഹമ്മദ് ഷിയാസ്, ജമാഅത്തെ ഇസ്ലാമി പയ്യോളി ഏരിയാ പ്രസിഡന്റ് അബ്ദുറഹ്‌മാന്‍ ഫാറൂഖ് എന്നിവര്‍ പങ്കെടുത്തു.