വടകരയിലെ അപകടം നടന്നത് വൈദിക സംഘം പാലായില്‍ നിന്ന് മടങ്ങവെ; മരണപ്പെട്ട വൈദികന്റെ മൃതദേഹം പുറത്തെടുത്തത് കാര്‍ വെട്ടിപ്പൊളിച്ച്
വടകര: മുക്കാളിയില്‍ വൈദികരുടെ സംഘം സഞ്ചരിച്ച കാര്‍ അപകടത്തില്‍പ്പെട്ടത് പാലായില്‍ നിന്നും തലശ്ശേരിയിലേക്കുള്ള മടക്ക യാത്രയ്ക്കിടെ. പുലര്‍ച്ചെ നാലുമണിയോടെ മേലേ മുക്കാളിയായിരുന്നു അപകടം നടന്നത്.
ഇവര്‍ സഞ്ചരിച്ച കാര്‍ ദേശീയപാതയോരത്ത് നിര്‍ത്തിയിട്ടിരുന്ന ടാങ്കര്‍ ലോറിയില്‍ ഇടിക്കുകയായിരുന്നു. ശബ്ദം കേട്ട് ഓടിയെത്തിയ പ്രദേശവാസികളും പൊലീസും അഗ്നിരക്ഷാസേനയും ചേര്‍ന്നാണ് പരിക്കേറ്റവരെ ആശുപത്രിയിലെത്തിച്ചത്. അഗ്നിരക്ഷാസേനയെത്തി കാര്‍ പൊളിച്ചാണ് മരണപ്പെട്ട വൈദികന്റെ മൃതദേഹം പുറപ്പെടുത്തിയത്.
തലശേരി മൈനര്‍ സെമിനാരി വൈസ് റെക്ടര്‍ ഫാ.അബ്രഹാം (മനോജ്) ഒറ്റപ്ലാക്കല്‍ (38) ആണ് മരണപ്പെട്ടത്. ഒപ്പമുണ്ടായിരുന്ന ഫാ.ജോര്‍ജ് കരോട്ട്, ഫാ.പോള്‍ മുണ്ടോളിക്കല്‍, ഫാ.ജോസഫ് പണ്ടാരപറമ്പില്‍ എന്നിവര്‍ക്കാണ് പരുക്കേറ്റത്. ഇവരെ വടകരയിലെ സ്വകാര്യ ആശുപത്രിയില്‍ പ്രവേശിപ്പിച്ചു.