അരിക്കോട്: കൊയിലാണ്ടി എടവണ്ണ സംസ്ഥാന പാതയില്‍ ബൈക്കും കാറും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. ചുങ്കത്തറ പള്ളിക്കടുത്ത് കരിങ്കോറമണ്ണ വാഴേ പറമ്പില്‍ ജിത്തു ആണ് മരിച്ചത്. ഇരുപത്തിനാല് വയസായിരുന്നു.

സുഹൃത്തിനൊപ്പം യാത്ര ചെയ്യവേ ഇന്നലെ രാത്രി എട്ടുമണിയോടെയായിരുന്നു അപകടം. ഇടിയുടെ ആഘാതത്തില്‍ ഇരുവരും റോഡിലേക്ക് തെറിച്ചുവീണു. പ്രദേശവാസികള്‍ യുവാക്കളെ ഉടന്‍ തന്നെ അരീക്കോട്ടെ സ്വകാര്യ ആശുപത്രിയിലെത്തിച്ചെങ്കിലും ജിത്തു മരണപ്പെടുകയായിരുന്നു.

സുകുമാരന്റെയും സുജാതയുടെയും മകനാണ്. സഹോദരന്‍: ജിഷ്ണു. സുഹൃത്ത് ചുങ്കത്തറ സ്വദേശി ജെസ്റ്റിന്‍ ആശുപത്രിയില്‍ ചികിത്സയിലാണ്. ജിത്തുവിന്റെ മൃതദേഹം പോസ്റ്റുമോര്‍ട്ടത്തിനുശേഷം ബുധനാഴ്ച ബന്ധുക്കള്‍ക്ക് വിട്ടുനല്‍കും.