അബുദാബി: അബുദാബി ബിഗ് ടിക്കറ്റ് നറുക്കെടുപ്പില്‍ മലയാളിയെ വീണ്ടും ഭാഗ്യം തുണച്ചു. ഖത്തറില്‍ ജോലി ചെയ്യുന്ന മലയാളിയായ മുജീബ് തെക്കേമാട്ടേരിക്കാണ് നറുക്കെടുപ്പിലെ ഗ്രാന്‍ഡ് സമ്മാനമായ 34 കോടിയോളം രൂപ( 15 ലക്ഷം ദിര്‍ഹം) സമ്മാനം ലഭിച്ചത്.

ദോഹയില്‍ താമസിക്കുന്ന ഇദ്ദേഹം ഓണ്‍ലൈന്‍ വഴിയാണ് ടിക്കറ്റ് സ്വന്തമാക്കിയത്. 098801 എന്ന ഭാഗ്യനമ്പറിനാണ് മുജീബിന് കോടികള്‍ സമ്മാനമടിച്ചത്. കഴിഞ്ഞ 8 വര്‍ഷമായി ബാങ്ക് ഓഡിയില്‍ ഡ്രൈവറായി ജോലി ചെയ്യുന്ന മുജീബ് 12 സുഹൃത്തുക്കളുമായി ചേര്‍ന്നാണ് ടിക്കറ്റെടുത്തത്. ഈ വലിയ തുക തങ്ങളുടെ ജീവിതം മാറ്റിമറിക്കുമെന്നാണ് മുജീബ് പറയുന്നത്. എല്ലാവരുമായി കൂടിയാലോചിച്ച് പണം എന്ത് ചെയ്യണമെന്ന് തീരുമാനിക്കുമെന്നും മുജീബ് പറയുന്നു.

ഇന്നലെ രാത്രി തന്നെ നടന്ന മറ്റു നറുക്കെടുപ്പുകളില്‍ 7 ഇന്ത്യക്കാര്‍ക്ക് കൂടി സമ്മാനം ലഭിച്ചു. ഇന്ത്യക്കാരായ അജീബ് ഒമര്‍(ഒരു ലക്ഷം), കെ.എ. മുഹമ്മദ് റിഷാദ്(70,000), ആന്റണി വിന്‍സെന്റ്( 60,000), അജ്മല്‍ കൊല്ലംകുടി ഖാലിദ്( 50,000), ലിപ്‌സണ്‍ കൂത്തുര്‍ വെള്ളാട്ടുകര പോള്‍(40,000), പൊയ്യില്‍ താഴെ കുഞ്ഞബ്ദുല്ല( 30,000), മുഹമ്മദ് അസീബ് ചെങ്ങനക്കാട്ടില്‍(20,000) എന്നിവരാണ് മറ്റു വിജയികള്‍.