വയോജനങ്ങളും ബാലസഭാംഗങ്ങളും ഒത്തുചേര്‍ന്നു; പഴമയും പുതുമയും തലമുറ സംഗമവുമായി തിക്കോടി പഞ്ചായത്തിലെ കുടുംബശ്രീ സി.ഡി.എസ്
തിക്കോടി: തിക്കോടി ഗ്രാമ പഞ്ചായത്ത് കുടുംബശ്രീ മോഡല്‍ സി.ഡി.എസിന്റെ നേതൃത്വത്തില്‍ ‘പഴമയും പുതുമയും’ തലമുറ സംഗമം സംഘടിപ്പിച്ചു. പഴയ തലമുറയിലെ വയോജനങ്ങള്‍, പുതുതലമുറയിലെ ഓക്‌സിലറി ഗ്രൂപ്പും ബാലസഭാംഗങ്ങളെയും ഉള്‍പെടുത്തിയാണ് പരിപാടി സംഘടിപ്പിച്ചത്. സി.ഡി.എസ് വൈസ് ചെയര്‍പേഴ്‌സണ്‍ ബിജിന വായോത്ത് സ്വാഗതം പറഞ്ഞു.
സി.ഡി.എസ് ചെയര്‍പേഴ്‌സണ്‍ പി.കെ.പുഷ്പ അധ്യക്ഷത വഹിച്ച ചടങ്ങില്‍ പഞ്ചായത്ത് പ്രസിഡണ്ട് ജമീല സമദ് ഉദ്ഘാടനം ചെയ്തു. ക്ഷേമ കാര്യ സ്റ്റാന്റിംഗ് കമ്മിറ്റി ചെയര്‍മാന്‍ ആര്‍.വിശ്വന്‍, വാര്‍ഡ് മെമ്പര്‍മാരായ വിബിത ബൈജു, സന്തോഷ് തിക്കോടി, ദിബിഷ.എം, ഷീബ പുല്പാണ്ടി, ജിഷ കാട്ടില്‍, ബിനു കാരോളി, കമ്മ്യൂണിറ്റി കൗണ്‍സിലര്‍ സ്‌നേഹ, സി.ഡി.എസ് മെമ്പര്‍മാര്‍, കുടുംബശ്രീ പ്രവത്തകര്‍ എന്നിവര്‍ സന്നിഹിതരായിരുന്നു. കില ആര്‍.പി ഭാസ്‌കരന്‍ മാസ്റ്റര്‍ മോഡറേറ്ററായിരുന്നു.
വയോജന സമൂഹം ഇന്ന്, ഇന്നലെ, നാളെ വയോജനങ്ങള്‍ നേരിടുന്ന വെല്ലുവിളികള്‍, പരിഹാര മാര്‍ഗങ്ങള്‍ എന്ന വിഷയത്തില്‍ വയോജന അംഗം മനയില്‍ രാജനും, വയോജന ക്ഷേമത്തില്‍ യുവജനങ്ങളുടെ പങ്ക് എന്ന വിഷയത്തില്‍ ഓക്‌സ്‌സിലറി ആര്‍.പി ഒലീനയും, വയോജന ക്ഷേമത്തില്‍ തദ്ദേശ സ്ഥാപനങ്ങളുടെ പങ്ക് എന്ന വിഷയത്തില്‍ ക്ഷേമ കാര്യ സ്റ്റാന്റിംഗ് ചെയര്‍മാന്‍ ആര്‍.വിശ്വനും, കുടുംബശ്രീയും വയോജന ക്ഷേമ പ്രവര്‍ത്തനങ്ങളിലും എന്ന വിഷയത്തില്‍ സി.ഡി.എസ് ചെയര്‍പേഴ്‌സണ്‍ പുഷ്പ പി.കെയും, വയോജന സൗഹൃദ സമൂഹ സൃഷ്ടിയില്‍കുടുംബത്തിന്റെ പങ്ക് എന്ന വിഷയത്തില്‍ ബ്‌ളോക്ക് കോ ഓഡിനേറ്റര്‍ സയനയും അവതരണം നടത്തി.
അവതരണത്തിന് ശേഷം ചര്‍ച്ച നടത്തുകയും അതു ക്രോഡീകരിച്ച് സംസാരിക്കുകയും ചെയ്തു. തുടര്‍ന്ന് കലാപരിപാടികള്‍ നടന്നു. ഈ പഴമയും പുതുമയും ‘തലമുറ സംഗമം’ വേറിട്ട അനുഭവമായി മാറി എന്നാണ് പങ്കെടുത്തവരുടെ അനുഭവം പങ്കുവെച്ചപ്പോള്‍ പറഞ്ഞത്. സമൂഹ്യ ഉപസമിതി കണ്‍വീനര്‍ ദീപ കാരാപ്പള്ളി നന്ദി പ്രകാശിപ്പിച്ചു.