കോഴിക്കോട്: പുതുവര്‍ഷത്തില്‍ ഫിലിം ഫെസ്റ്റിവലിനൊരുങ്ങി കോഴിക്കോട് കോര്‍പ്പറേഷന്‍. കോഴിക്കോടിന്റെ സാംസ്‌ക്കാരിക അഭിനയ രംഗത്ത് മുദ്ര പതിപ്പിച്ച ചിത്രങ്ങളോടൊപ്പം അന്താരാഷ്ട്ര ചലച്ചിത്രോത്സവത്തില്‍ സമ്മാനിതമായ മികച്ച ചിത്രങ്ങളും പ്രദര്‍ശിപ്പിക്കും. പ്രവേശനം സൗജന്യമായിരിക്കും.

ജനുവരി അഞ്ചു മുതല്‍ 11 വരെയാണ് പ്രദര്‍ശനം ഉണ്ടാവുക. ശ്രീ തിയേറ്ററിലാണ് കോക്കോ ഫിലിം ഫെസ്റ്റ് എന്ന പേരിലാണ് ചലച്ചിത്ര മേള നടക്കുന്നത്. സിനിമയുടെ മാജിക്കും സാഹിത്യവും കലരുന്നതായിരിക്കും ചലച്ചിത്ര മേളയെന്ന് മേയര്‍ ബീന ഫിലിപ്പ് പറഞ്ഞു. കോഴിക്കോടിന്റെ ഏതെങ്കിലും തരത്തില്‍ ബന്ധപ്പെട്ടിട്ടുളള ചലച്ചിത്രങ്ങളുമായിരിക്കും പ്രദര്‍ശിപ്പിക്കുക.

ചലച്ചിത്ര അക്കാദമിയുമായി സഹകരിച്ചാണ് മേള സംഘടിപ്പിക്കുന്നത്. ആദ്യം രജിസ്റ്റര്‍ ചെയ്യുന്ന 200 പേര്‍ക്കാണ് ഓരോ സിനിമയും കാണാന്‍ അവസരം ലഭിക്കുക. ജനുവരി അഞ്ചിന് വൈകീട്ട് ചലച്ചിത്ര മേളയുടെ ഉദ്ഘാടനം നടക്കും.
രജിസ്റ്റര്‍ ചെയ്യാന്‍ www.kocofilmfest.eventupdates.online എന്ന വെബ്‌സൈറ്റ് സന്ദര്‍ശിക്കുക.