മാലിന്യമുക്തം നവകേരളം ജനകീയ ക്യാമ്പയിന്‍ ജില്ലയില്‍ ഒന്നാം സ്ഥാനം കൊയിലാണ്ടി നഗരസഭയ്ക്ക്; അവാര്‍ഡ് ഏറ്റുവാങ്ങി
കൊയിലാണ്ടി: മാലിന്യമുക്തം നവകേരളം ജനകീയ ക്യാമ്പയിന്‍ ജില്ലയില്‍ ഒന്നാം സ്ഥാനത്തിനുള്ള അവാര്‍ഡ് ഏറ്റുവാങ്ങി കൊയിലാണ്ടി നഗരസഭ. കോഴിക്കോട് വി. അബ്ദുറഹിമാന്‍ സ്മാരക ഹാളില്‍ നടന്ന ചടങ്ങില്‍ വനം വന്യജീവി വകുപ്പ് മന്ത്രി എ കെ ശശീന്ദ്രന്‍നില്‍ നിന്നും നഗരസഭ ചെയര്‍പേഴ്‌സണ്‍ സുധ കിഴക്കേപ്പാട്ടും വൈ. ചെയര്‍മാന്‍ അഡ്വ. കെ സത്യനും സ്റ്റാന്‍ഡിങ് കമ്മിറ്റി ചെയര്‍മാന്‍മാരും ഉദ്യോഗസ്ഥരും ചേര്‍ന്ന് അവാര്‍ഡ് ഏറ്റുവാങ്ങി.
2024 ഒക്ടോബര്‍ 2 ഗാന്ധിജയന്തി ദിനം മുതല്‍ അന്താരാഷ്ട്ര സീറോ വേസ്റ്റ് ദിനമായ മാര്‍ച്ച് 30 വരെ ശുചിത്വ മാലിന്യ സംസ്‌കരണ രംഗത്ത് നഗരസഭയില്‍ നടത്തിയ പ്രവര്‍ത്തനങ്ങള്‍ക്കാണ് അവാര്‍ഡ് ലഭിച്ചിട്ടുള്ളത്. മികച്ച രീതിയില്‍ സൗന്ദര്യവല്‍ക്കരണം നടത്തിയതിനും മികച്ച പൊതു സ്ഥലങ്ങള്‍ സൃഷ്ടിച്ചതിനും മികച്ച ഹരിത പൊതുസ്ഥലങ്ങള്‍ സൗന്ദര്യവല്‍ക്കരിച്ചതിനുമുള്ള അവാര്‍ഡുകളും കൊയിലാണ്ടി നഗരസഭയ്ക്കാണ് ലഭിച്ചിട്ടുള്ളത്.