ചക്കിട്ടപ്പാറ കടന്ത്രപ്പുഴയില്‍ വയോധികനെ കാണാതായതായി സംശയം; പ്രദേശത്ത് തിരച്ചില്‍
ചക്കിട്ടപ്പാറ: ചക്കിട്ടപ്പാറ കടന്ത്രപ്പുഴയില്‍ വയോധികനെ കാണാതായതായി സംശയത്തെ തുടര്‍ന്ന് പ്രദേശത്ത് വ്യാപകമായ തിരച്ചില്‍ തുടങ്ങി. ഇന്നലെ രാത്രി ഇയാള്‍ പുഴയില്‍ വീണെന്ന് സംശയിക്കുന്നതായാണ് പ്രദേശവാസികള്‍ പറയുന്നത്.
രാത്രി പുഴയില്‍ ചൂണ്ടയിടുന്നവര്‍ പുഴയ്ക്ക് സമീപത്ത് ടോര്‍ച്ചുമായി നില്‍ക്കുന്ന ഇയാളെ കണ്ടിരുന്നു. പിന്നീട് എന്തോ വീഴുന്ന ശബ്ദവും കേട്ടു. തുടര്‍ന്ന് പുഴയ്ക്കരികില്‍ നിന്നും ഇയാളുടെ ടോര്‍ച്ച് കിട്ടിയിരുന്നു. രാവിലെ പ്രദേശത്ത് അന്വേഷിച്ചെങ്കിലും ഇയാളെ കാണാനില്ലെന്ന് മനസിലായതോടെ ഫയര്‍ഫോഴ്‌സില്‍ വിവരം അറിയിക്കുകയായിരുന്നു.
പേരാമ്പ്രയില്‍ നിന്നും സ്റ്റേഷന്‍ ഓഫീസര്‍ സി.പി.ഗിരീശന്റെ നേതൃത്വത്തില്‍ അസിസ്റ്റന്റ് സ്റ്റേഷന്‍ ഓഫീസര്‍ ടി.സി.പ്രേമന്‍, എം.ഗണേശന്‍ തുടങ്ങിയവരുള്‍പ്പെട്ട സംഘമാണ് പ്രദേശത്ത് തിരച്ചില്‍ നടത്തുന്നത്.