ഒരു സ്മാര്‍ട്ട് ഫോണ്‍ മതി ലോകം മുഴുവനും നമ്മുടെ കാല്‍ചുവട്ടിലെത്താന്‍. ഡിജിറ്റല്‍ ലോകത്ത് ജീവിക്കുന്നവരുടെ കാര്യമാണിത്. വിദ്യാഭ്യാസം മുതല്‍ ജോലി വരെ, ഷോപിംഗ് മുതല്‍ ബാങ്കിംഗ് പേയ്മെന്റ് വരെ…എല്ലാം ഓണ്‍ലൈനായി. കോവിഡിന് മുമ്പും ഓണ്‍ലൈന്‍ സേവനങ്ങള്‍ ലഭ്യമായിരുന്നെങ്കിലും ലോക്ഡൗണും യാത്രാവിലക്കുമെല്ലാം കാര്യങ്ങള്‍ എളുപ്പമാക്കി. ഇന്ന് കുഞ്ഞു കുട്ടികള്‍ മുതല്‍ പ്രായമായവര്‍ വരെ ഓണ്‍ലൈന്‍ സേവനങ്ങളെയാണ് ആശ്രയിക്കുന്നത്. എന്നാല്‍ ഇതിന്റെ പിന്നില്‍ ഒളിഞ്ഞിരിക്കുന്ന കവുകന്‍ കണ്ണുകളെ ഇവര്‍ കാണുന്നില്ല എന്നതാണ് വാസ്തവം.

നമ്പര്‍ വെരിഫിക്കേഷന്‍, കസ്റ്റമര്‍ കെയര്‍ എക്‌സിക്യൂട്ടീവ്, ബാങ്ക് ജീവനക്കാരന്‍ തുടങ്ങി നിരവധി മേഖലകലില്‍ നിന്നുള്ള വ്യാജ കോളുകളാണ് നിരവധി പേര തേടി ദിനംപ്രതി എത്തുന്നത്. ഇവര്‍ ഉപഭോക്താവിന്റെ വിശ്വാസ്യത നേടിയെടുത്ത ശേഷം മൊബൈലിലെത്തുന്ന ഒ.ടി.പി ചോദിക്കും. ഇതോടെ കാര്യങ്ങള്‍ എല്ലാം അവതാളത്തിലാകും. ബാങ്ക് അക്കൗണില്‍ നിന്ന പണം നഷ്ടപ്പെട്ടു കഴിഞ്ഞാലാണ് ഇവരില്‍ പലരും അമളി മനസിലാക്കുന്നത്. വിദ്യാസമ്പന്നരും ഉദ്യോഗസ്ഥരും വരെ ഓണ്‍ലൈന്‍ തട്ടിപ്പിന് ഇരകളാകുന്നു. മിക്ക കേസുകളിലും പരാതികള്‍ കൊണ്ട് ഒന്നും നേടാനാകുന്നില്ല. അപ്പോള്‍ എന്താണ് പരിഹാരം?

സൈബര്‍ കുറ്റകൃത്യങ്ങള്‍ക്കെതിരെ കേന്ദ്ര സര്‍ക്കാര്‍ ആരംഭിച്ച വെബ്സൈറ്റാണ് പ്രതിവിധി. ഓണ്‍ലൈന്‍ തട്ടിപ്പിന് ഇരയായ ആളുകള്‍ക്കായി ആഭ്യന്തര മന്ത്രാലയമാണ് ഈ സംവിധാനം ഒരുക്കിയിട്ടുള്ളത്. സാധാരണക്കാര്‍ക്ക് പൂര്‍ണ സഹായമാണ് ഇവിടെ നല്‍കുന്നത്. നിങ്ങള്‍ക്ക് എങ്ങനെ അതിന്റെ സഹായം സ്വീകരിക്കാം, ഒരു പരാതി എങ്ങനെ ഫയല്‍ ചെയ്യാം, നിങ്ങളുടെ പരാതികള്‍ എങ്ങനെ പരിഹരിക്കാം തുടങ്ങിയവയെ കുറിച്ച് വിശദമായി നോക്കാം.

ആഭ്യന്തര മന്ത്രാലയത്തിന്റെ ഈ സംരംഭം എന്താണ്?

ഈ പോര്‍ട്ടല്‍ സൈബര്‍ ക്രൈം പരാതികള്‍ ഓണ്‍ലൈനായി നല്‍കാനുള്ളതാണ്. ഇരകള്‍ക്കോ പരാതിക്കാര്‍ക്കോ വേണ്ട സഹായം ഇവിടെ ലഭ്യമാണ്. ഈ പോര്‍ടല്‍ സൈബര്‍ കുറ്റകൃത്യങ്ങളുമായി ബന്ധപ്പെട്ട പരാതികള്‍ക്കും പ്രത്യേകിച്ച് സ്ത്രീകള്‍ക്കും കുട്ടികള്‍ക്കും എതിരായ സൈബര്‍ കുറ്റകൃത്യങ്ങളുടെ പരാതികള്‍ക്കും മാത്രമുള്ളതാണ്.

പരാതികള്‍ ബന്ധപ്പെട്ട സംസ്ഥാന പൊലീസ്, സംസ്ഥാന അല്ലെങ്കില്‍ കേന്ദ്ര നിയമ ഏജന്‍സികള്‍ നല്‍കുന്ന വിവരങ്ങളുടെ അടിസ്ഥാനത്തിലാണ് കൈകാര്യം ചെയ്യുന്നത്. അത്തരം സന്ദര്‍ഭങ്ങളില്‍, വേഗത്തിലുള്ള നടപടിക്കായി പരാതി രജിസ്റ്റര്‍ ചെയ്യുമ്‌ബോള്‍ കൃത്യമായ വിവരങ്ങള്‍ നല്‍കേണ്ടത് ആവശ്യമാണ്. വിവരങ്ങള്‍ ശരിയാണെങ്കില്‍, അത് കുറ്റവാളിയിലേക്ക് എത്താന്‍ അന്വേഷണ ഏജന്‍സികളെ സഹായിക്കുന്നു.

എവിടെ, എങ്ങനെ പരാതിപ്പെടാം?

1. പരാതിപ്പെടാനായി https://www(dot) cybercrime(dot)gov(dot)in എന്ന വെബ്‌സൈറ്റ് സന്ദര്‍ശിക്കുക. നിങ്ങളുടെ മൊബൈല്‍ ഫോണ്‍ ബ്രൗസറിലും ഇത് തുറക്കാന്‍ കഴിയും.

2. തുടര്‍ന്ന് നിങ്ങള്‍ക്ക് ‘File a complaint’ എന്ന ഓപ്ഷന്‍ കാണാം. ഇവിടെ ക്ലിക് ചെയ്യുന്നതിലൂടെ, നിങ്ങളെ പരാതി പേജിലേക്ക് കൊണ്ടുപോകും. ശേഷം നിങ്ങള്‍ക്ക് രണ്ട് തരം ഓപ്ഷനുകള്‍ കാണാം. സ്ത്രീകളുടെയോ കുട്ടികളുടെയോ കുറ്റകൃത്യങ്ങളും മറ്റ് സൈബര്‍ കുറ്റകൃത്യങ്ങളും. നിങ്ങള്‍ ശരിയായ ഓപ്ഷന്‍ തെരഞ്ഞെടുത്ത് ക്ലിക് ചെയ്താല്‍, വിവരങ്ങള്‍ നല്‍കുന്നതിനുള്ള പേജ് തുറക്കും. ആവശ്യമായ വിവരങ്ങള്‍ അവിടെ നല്‍കുക.

നിങ്ങള്‍ ആദ്യമായാണ് പരാതി നല്‍കുന്നതെങ്കില്‍ അകൗണ്ട് രെജിസ്റ്റര്‍ ചെയ്യണം. ആവശ്യമായ വിവരങ്ങള്‍ നല്‍കുന്നതിലൂടെ, നിങ്ങള്‍ക്ക് നിങ്ങളുടെ ലോഗിന്‍ ഐഡി സൃഷ്ടിക്കാന്‍ കഴിയും, തുടര്‍ന്ന് നിങ്ങള്‍ക്ക് ഒരു പരാതി രെജിസ്റ്റര്‍ ചെയ്യാം.

പരാതി ട്രാക് ചെയ്യാം

പരാതി രജിസ്റ്റര്‍ ചെയ്തതിന് ശേഷം സ്വീകരിച്ച നടപടികളെക്കുറിച്ചുള്ള വിവരങ്ങളും ഈ വെബ്സൈറ്റില്‍ ലഭിക്കും. ഇതിനായി, വീണ്ടും വെബ്‌സൈറ്റില്‍ പോയി ‘Track your Complaint’ എന്ന ഓപ്ഷന്‍ തെരഞ്ഞെടുക്കുക. നിങ്ങളുടെ പരാതി നമ്ബര്‍ ഇവിടെ നല്‍കുന്നതിലൂടെ, പരാതിയില്‍ ഇതുവരെ പൊലീസോ അന്വേഷണ ഏജന്‍സിയോ എന്ത് നടപടി സ്വീകരിച്ചുവെന്ന് അറിയാന്‍ കഴിയും.

പണം തട്ടിപ്പിന് ഉടന്‍ വിളിക്കുക

ഓണ്‍ലൈനില്‍ നിങ്ങളുമായി ബന്ധപ്പെട്ട എന്തെങ്കിലും സാമ്ബത്തിക തട്ടിപ്പ് നടന്നിട്ടുണ്ടെങ്കില്‍ നിങ്ങള്‍ക്ക് ഉടന്‍ തന്നെ ഹെല്‍പ് ലൈന്‍ നമ്ബറായ 1930 ല്‍ വിളിക്കാം. ഇത് ഒരു ടോള്‍ ഫ്രീ നമ്ബറാണ്. ഇവിടെ നിങ്ങള്‍ക്ക് കഴിയുന്നത്ര സഹായം ഉടന്‍ നല്‍കും.