വടകര: ക്രിസ്തുമസ് -പുതുവത്സര സ്‌പെഷ്യല്‍ ഡ്രൈവിന്റെ ഭാഗമായുള്ള എക്‌സൈസിന്റെ പരിശോധനയില്‍ അയനിക്കാട് സ്വദേശിയടക്കം രണ്ട് പേര്‍ കഞ്ചാവുമായി പിടിയില്‍. എറണാകുളം തൃക്കാക്കര സ്വദേശി ദിനേശന്‍ (62), അയനിക്കാട് ആവിതാരേമ്മല്‍ സന്‍ടു പി എന്നിവരാണ് പിടിയിലായത്. പാലോളിപ്പാലം, കോട്ടക്കടവ് എന്നിവിടങ്ങളില്‍ നിന്നാണ് പിടിയിലായത്.

ഇന്ന് രാവിലെ 11.10 ഓടെ പുതുപ്പണം കോട്ടക്കടവില്‍ നടത്തിയ പരിശോധനക്കിടയില്‍ നാണു സ്മാരക ബസ്സ്‌റ്റോപ്പിന് സമീപത്തു നിന്നുമാണ് ദിനേശന്‍ പിടിയിലാവുന്നത്. സംശയകരമായ സാഹചര്യത്തില്‍ കണ്ടെതിനെ തുടര്‍ന്ന് പരിശോധിച്ചപ്പോള്‍ ഇയാളുടെ കൈവശം നിന്നും 200 ഗ്രാം കഞ്ചാവ് കണ്ടെത്തി. വടകര റെയിഞ്ച് എക്‌സൈസ് ഇന്‍സ്‌പെക്ടര്‍ കെ പി ഹരീഷ് കുമാറിന്റെ നേതൃത്വത്തില്‍ അസിസ്റ്റന്റ് എക്‌സൈസ് ഇന്‍സ്‌പെക്ടര്‍ പ്രമോദ് പുളിക്കൂല്‍, പ്രിവന്റീവ് ഓഫീസര്‍ ഉനൈസ് എന്‍.എം, സി.എം സുരേഷ് കുമാര്‍, സായിദാസ് കെ.പി, സിവില്‍ എക്‌സൈസ് ഓഫീസര്‍മാരായ അനിരുദ്ധ്.പി കെ എന്നിവര്‍ പരിശോധന സംഘത്തിലുണ്ടായിരുന്നു.

രഹസ്യ വിവരത്തിന്റെ അടിസ്ഥാനത്തില്‍ വടകര സര്‍ക്കിള്‍ ഓഫീസിലെ അസി. എക്സൈസ് ഇന്‍സ്പെക്ടര്‍ പ്രമോദ് പുളിക്കൂലും പാര്‍ട്ടിയും നടത്തിയ പരിശോധനയില്‍ പാലോളിപ്പാലം ബസ് സ്റ്റോപ്പിന് സമീപം വെച്ചാണ് സന്‍ടു പിടിയിലായത്. ഇന്ന് ഉച്ചയ്ക്ക് 12.30 ഓടെയായിരുന്നു സംഭവം. 20 ഗ്രാം കഞ്ചാവ് ഇയാളില്‍ നിന്നും പിടിച്ചെടുത്തു. സംഘത്തില്‍ പ്രിവന്റീവ് ഓഫീസര്‍ എന്‍ എം ഉനൈസ്, സി എം സുരേഷ് കുമാര്‍, കെ പി സായിദാസ്, സിവില്‍ എക്‌സൈസ് ഓഫീസര്‍മാരായ പി കെ അനിരുദ്ധ്, ഇ എം മുസ്ബിന്‍ എന്നിവരുമുണ്ടായിരുന്നു.