ചേളന്നൂര്‍: വാശിയേറിയ കലാ-കായിക മത്സരങ്ങരങ്ങള്‍ക്കൊടുവില്‍ ജില്ലാ കേരളോത്സവത്തില്‍ 322 പോയിന്റുമായി ചേളന്നൂര്‍ ബ്ലോക്ക് പഞ്ചായത്ത് ഓവറോള്‍ ചാമ്പ്യന്‍മാരായി. 275 പോയിന്റുമായി കുന്നമംഗലം ബ്ലോക്ക് പഞ്ചായത്താണ് റണ്ണേഴ്സ് അപ്പായത്.

പുറമേരിയില്‍ മൂന്ന് ദിവസങ്ങളിലായി നടന്ന ജില്ലാ കേരളോത്സവത്തിന്റെ കലാമത്സരങ്ങള്‍ ഇന്ന വെകുന്നേരത്തെടയാണ് സമാപിച്ചത്. കേരള സംസ്ഥാന യുവജന ക്ഷേമ ബോര്‍ഡും കോഴിക്കോട് ജില്ലാ പഞ്ചായത്തും സംയുക്തമായാണ് പരിപാടി സംഘടിപ്പിച്ചത്. ഒരു മാസക്കാലമായി അയ്യായിരത്തോളം കലാ കായിക താരങ്ങളാണ് കേരളോത്സവത്തില്‍ പങ്കെടുത്തത്.

പന്തലായനി ബ്ലോക്ക് പഞ്ചായത്തിലെ തേജസ് കലാപ്രതിഭയായും പേരാമ്പ്ര ബ്ലോക്ക് പഞ്ചായത്തിലെ കൃഷ്ണപ്രിയ കലാതിലകവുമായി തിരഞ്ഞെടുക്കപ്പെട്ടു. കലാമത്സരങ്ങളില്‍ 188 പോയിന്റുമായി ചേളന്നൂര്‍ ബ്ലോക്ക് പഞ്ചായത്ത് ഒന്നാം സ്ഥാനവും 185 പോയിന്റുമായി വടകര ബ്ലോക്ക് പഞ്ചായത്ത് രണ്ടാം സ്ഥാനവും കരസ്ഥമാക്കി. കായിക മേളയില്‍ 184 പോയിന്റുമായി കോഴിക്കോട് കോര്‍പ്പറേഷന്‍ ഒന്നാം സ്ഥാനവും 139 പോയിന്റുമായി ചേളന്നൂര്‍ ബ്ലോക്ക് രണ്ടാം സ്ഥാനവും കരസ്ഥമാക്കി.

പുറമേരിയില്‍ നടന്ന സമാപന സമ്മേളനം കെ.പി കുഞ്ഞമ്മദ് കുട്ടി മാസ്റ്റര്‍ എം എല്‍ എ ഉദ്ഘാടനം ചെയ്തു .ജില്ലാ പഞ്ചായത്ത് പ്രസിഡന്റ് ഷീജ ശശി അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്റ് അഡ്വ. പി ഗവാസ്,തൂണേരി ബ്ലോക്ക് പഞ്ചായത്ത് പ്രസിഡന്റ് കെ പി വനജ,ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റ് എം സുനില്‍ കുമാര്‍, ജില്ലാ പഞ്ചായത്ത് മെമ്പര്‍മാരായ സി വി എം നജ്മ, എന്‍ എം വിമല, ബ്ലോക്ക് പഞ്ചായത്ത് മെമ്പര്‍മാരായ ബിന്ദു പുതിയോട്ടില്‍, രാജീന്ദ്രന്‍ കപ്പള്ളി, വാര്‍ഡ് മെമ്പര്‍ കെ വിജിഷ, സെക്രട്ടറി ഇന്‍ ചാര്‍ജ് അബ്ദുല്‍ മുനീര്‍ കെ, ജില്ലാ യൂത്ത് ഓഫീസര്‍ വിനോദന്‍ പൃത്തിയില്‍ എന്നിവര്‍ സംസാരിച്ചു.

പുറമേരി ഗ്രാമപഞ്ചായത്ത് പ്രസിഡന്റ് അഡ്വ. ജ്യോതി ലക്ഷ്മി സ്വാഗതവും യുവജന ക്ഷേമ ബോര്‍ഡ് ജില്ലാ കോര്‍ഡിനേറ്റര്‍ ടി കെ സുമേഷ് നന്ദിയും പറഞ്ഞു.[mid5]