പയ്യോളി മുനിസിപ്പാലിറ്റി വാര്‍ഡ് കൗണ്‍സിലറുടെ വീട്ടിലെ കവര്‍ച്ച; 19 വയസുകാരനടക്കം കീഴൂർ സ്വദേശികളായ രണ്ട് പേര്‍ പോലീസ് പിടിയില്‍
പയ്യോളി: കീഴൂര്‍ തുറശ്ശേരിക്കടവിന് സമീപം പയ്യോളി മുനിസിപ്പാലിറ്റി വാര്‍ഡ് കൗണ്‍സിലറുടെ വീട്ടില്‍ക്കയറി പണം കവര്‍ന്ന കേസില്‍ രണ്ടു പേര്‍ പിടിയില്‍. കീഴൂര്‍ സ്വദേശികളായ പുതുക്കാട് മുഹമ്മദ് റാഷിദ് (37), മാനയില്‍ കനി എം.കെ സജീര്‍ (19) എന്നിവരാണ് പിടിയിലായത്. പയ്യോളി പോലീസ് ഇൻസ്പെക്ടർ എ.കെ സജീഷിൻ്റെ നിർദ്ദേശമനുസരിച്ച് എസ്.ഐ പി റഫീഖിൻ്റെ നേതൃത്വത്തിൽ സിപിഒ ഷനോജ്, ക്രൈം സ്ക്വാഡ് അംഗങ്ങളായ വി.സി ബിനീഷ്, ടി.കെ ശോഭിത്ത്, ജി ഷനോജ് എന്നിവരടങ്ങിയ സംഘമാണ് പ്രതികളെ കസ്റ്റഡിയിലെടുത്തത്.
കഴിഞ്ഞ ചൊവ്വാഴ്ച രാത്രിയാണ് കവര്‍ച്ച നടന്നത്. കോവുപ്പുറത്തുനിന്നുള്ള നഗരസഭാംഗമായ സി.കെ.ഷഹനാസിന്റെ വീട്ടിലാണ് മോഷണം നടന്നത്. 1200 യു.എ.ഇ ദിര്‍ഹവും 42,000 രൂപയുമാണ് നഷ്ടപ്പെട്ടത്. സഹോദരി ഭര്‍ത്താവിന്റെ മരണാനന്തര ചടങ്ങില്‍ പങ്കെടുക്കാനായി പോയതായിരുന്നു ഷഹനാസും കുടുംബവും. വീട് പൂട്ടിയിട്ട നിലയിലായിരുന്നു. മുകള്‍നിലയില്‍ ഓടിട്ടതായിരുന്നു. ഇത് പൊളിച്ചാണ് മോഷ്ടാക്കള്‍ അകത്തുകടന്നത്.
പയ്യോളിയില്‍ നഗരസഭാംഗത്തിന്റെ വീട്ടില്‍ കവര്‍ച്ച; ദിര്‍ഹവും 42,000രൂപയും നഷ്ടമായി
രാത്രി 11.30 ഓടെ വീട്ടിലെത്തിയപ്പോഴാണ് മോഷണ വിവരം അറിയുന്നത്. കിടപ്പുമുറയില്‍ ഹാന്റ് വാഷ് ഒഴിച്ചതും അലമാരയുടെ പൂട്ട് തകര്‍ത്തതും ശ്രദ്ധയില്‍പ്പെട്ടതോടെ പരിശോധിച്ചപ്പോഴാണ് പണം നഷ്ടപ്പെട്ടത് മനസിലാവുന്നത്.
Description: Burglary at the house of a municipal councilor in Payyoli; Two natives of Keezhur arrested