Jinsy B

തിക്കോടി: തിക്കോടിയില്‍വെച്ച് വന്ദേ ഭാരത് എക്‌സ്പ്രസിന് കല്ലെറിഞ്ഞ യുവാവ് പിടിയില്‍. 32 വയസു തോന്നുന്ന ഇയാള്‍ ഹിന്ദി സംസാരിക്കുന്നയാളാണ്. ചന്ദ്രുവെന്നാണ് പേര് പറഞ്ഞത്. വെള്ളറക്കാടുവെച്ചാണ് ഇയാള്‍ ആര്‍.പി.എഫിന്റെ പിടിയിലായത്. പരസ്പര ബന്ധമില്ലാതെയാണ് ഇയാള്‍ സംസാരിക്കുന്നതെന്ന് ഉദ്യോഗസ്ഥര്‍ പറഞ്ഞു. മാനസികാസ്വാസ്ഥ്യം പ്രകടിപ്പിച്ചതിനെ തുടര്‍ന്ന് ഇയാളെ കുതിരവട്ടം മാനസികാരോഗ്യ കേന്ദ്രത്തിലേക്ക് മാറ്റി. തിരുവനന്തപുരം-കാസര്‍കോട് വന്ദേഭാരത് എക്സ്പ്രസിന് നേരെയാണ് ആക്രമണം

പയ്യോളി: തിക്കോടി കല്ലകത്ത് കടപ്പുറത്ത് നിന്നും ഫൈബര്‍ വള്ളത്തിന്റെ എഞ്ചിനും വള്ളത്തിലുണ്ടായിരുന്ന മണ്ണെണ്ണയും മോഷണം പോയതായി പരാതി. പയ്യോളി സ്വദേശി ശ്രീജിത്ത്.സി.പിയുടെ ഉടമസ്ഥതയിലുളള ശ്രീകുറുംബ ഫൈബര്‍ വളളത്തിന്റെ എഞ്ചിനാണ് മോഷണം പോയത്. ഇന്നലെ രാത്രിയായിരുന്നു സംഭവം. തിക്കോടി കല്ലകത്ത് നിന്നാണ് വള്ളം സ്ഥിരമായി മത്സ്യബന്ധനത്തിനായി പോകാറുള്ളതെന്ന് ശ്രീജിത്ത് പറഞ്ഞു. ഇന്നലെ പതിവുപോലെ കടപ്പുറത്ത് വള്ളം നിര്‍ത്തിയിട്ടതായിരുന്നു.