അയ്യങ്കാളി ടാലന്റ് സെര്‍ച്ച് സ്‌കോളര്‍ഷിപ്പിന് അപേക്ഷിക്കാം; അറിയാം വിശദമായി
പേരാമ്പ്ര: 2024-25 വര്‍ഷം അയ്യങ്കാളി സ്മാരക ടാലന്റ് സെര്‍ച്ച് ആന്‍ഡ് ഡെവലപ്‌മെന്റ് സ്‌കീമിലേക്ക് അപേക്ഷ ക്ഷണിച്ചു.
യുപി വിഭാഗം, ഹൈസ്‌കൂള്‍ വിഭാഗം എന്നിങ്ങനെ രണ്ടു വിഭാഗങ്ങളിലായി പട്ടികവര്‍ഗത്തില്‍പ്പെട്ട, 5, 8 ക്ലാസുകളിലെ വിദ്യാര്‍ത്ഥികള്‍ക്ക് അപേക്ഷിക്കാം. കുടുംബ വാര്‍ഷിക വരുമാനം ഒരു ലക്ഷം രൂപ കവിയാന്‍ പാടില്ല.
അപേക്ഷകര്‍ സര്‍ക്കാര്‍/എയ്ഡഡ് സ്‌കൂളില്‍ നാല്, ഏഴ് ക്ലാസുകളില്‍ എല്ലാ വിഷയങ്ങള്‍ക്കും എ ഗ്രേഡ് ലഭിച്ചവരും യുപി, എച്ച്എസ് വിഭാഗം ക്ലാസ്സുകളില്‍ സര്‍ക്കാര്‍/എയ്ഡഡ് സ്‌കൂളുകളില്‍ ചേര്‍ന്ന് പഠനം തുടരുന്നവരും ആയിരിക്കണം.
പട്ടികവര്‍ഗ വിഭാഗത്തിലെ പിവിടിജി വിദ്യാര്‍ത്ഥികളില്‍ ബി ഗ്രേഡ് വരെയുള്ളവര്‍ക്കും അപേക്ഷിക്കാം.
ടാലന്റ് സെര്‍ച്ച് പരീക്ഷയ്ക്കുള്ള പരീക്ഷാകേന്ദ്രങ്ങള്‍ അതത് ജില്ലകളിലെ നിശ്ചിത കേന്ദ്രങ്ങള്‍/എം ആര്‍ എസുകള്‍ ആയിരിക്കും. രേഖകള്‍ സഹിതം നിശ്ചിത ഫോമിലുള്ള അപേക്ഷ കോഴിക്കോട് സിവില്‍ സ്റ്റേഷന്‍ പ്രവര്‍ത്തിക്കുന്ന ട്രൈബല്‍ ഡെവലപ്‌മെന്റ് ഓഫീസിലോ താമരശ്ശേരി മിനി സിവില്‍ സ്റ്റേഷനില്‍ പ്രവര്‍ത്തിക്കുന്ന കോടഞ്ചേരി ട്രൈബല്‍ എക്സ്റ്റന്‍ഷന്‍ ഓഫീസിലോ പേരാമ്പ്ര ബ്ലോക്ക് പഞ്ചായത്ത് ഓഫീസില്‍ പ്രവര്‍ത്തിക്കുന്ന പേരാമ്പ്ര ട്രൈബല്‍ എക്സ്റ്റന്‍ഷന്‍ ഓഫീസിലോ നല്‍കണം. അവസാന തീയതി ഡിസംബര്‍ 10 വൈകീട്ട് 5. ഫോണ്‍: 0495-2376364.