കൊയിലാണ്ടിയില്‍ പട്ടാപ്പകല്‍ മോഷണം; റോഡരികില്‍ നിര്‍ത്തിയിട്ട ഗുഡ്‌സ് ഓട്ടോയുടെ ബാറ്ററിയുമായി കടന്നുകളഞ്ഞ് യുവാവ്- വീഡിയോ
കൊയിലാണ്ടി: ദേശീയപാതയില്‍ മീത്തലെക്കണ്ടി പള്ളിയ്ക്ക് സമീപം റോഡരികില്‍ നിര്‍ത്തിയിട്ട ഗുഡ്‌സ് ഓട്ടോറിക്ഷയില്‍ നിന്നും ബാറ്ററി മോഷണം പോയി. ഇന്നലെ വൈകുന്നേരം അഞ്ച് മണിയ്ക്കാണ് സംഭവം. നിര്‍ത്തിയിട്ട ഓട്ടോയുടെ അടുത്തായി സ്‌കൂട്ടര്‍ നിര്‍ത്തിയശേഷം പുറത്തിറങ്ങിയ യുവാവ് പരിസരം നിരീക്ഷിച്ചശേഷം ഓട്ടോയുടെ അടുത്ത് പോയി ബാറ്ററിയുമായി കടന്നുകളയുകയായിരുന്നു.
വീഡിയോ:
ഇതിനടുത്തുള്ള സ്ഥാപനത്തിലെ ചരക്കുകള്‍ എത്തിക്കുന്ന ഓട്ടോയുടെ ബാറ്ററിയാണ് നഷ്ടപ്പെട്ടത്. സന്ധ്യയോടെ ഡ്രൈവര്‍ വാഹനമെടുത്ത് പോകാന്‍ ഒരുങ്ങിയപ്പോഴാണ് ബാറ്ററി നഷ്ടപ്പെട്ടത് അറിയുന്നത്. തുടര്‍ന്ന് സമീപത്തെ സി.സി.ടി.വി ദൃശ്യങ്ങള്‍ പരിശോധിച്ചപ്പോഴാണ് മോഷണം നടന്നത് വ്യക്തമായത്. കൊയിലാണ്ടി പൊലീസില്‍ പരാതി നല്‍കിയിട്ടുണ്ട്.