കൊയിലാണ്ടി: വാഗാഡ് ലോറിയുടെ ടയര്‍ ഊരിത്തെറിച്ച് പരിക്കേറ്റ് ചികിത്സയിലായിരുന്ന വയോധിക മരിച്ച സംഭവത്തിൽ വ​ഗാഡ് കമ്പനിക്കെതിരെ ​ഗുരുതര ആരോപണം. അപകടം സംഭവിച്ച ശേഷം വയോധികയെ ആശുപത്രിയിൽ എത്തിക്കുന്നതിനോ ആരോ​ഗ്യ സ്ഥിതിയെകുറിച്ച് അന്വേഷിക്കാനോ കമ്പനി അധികൃതർ ആരും തയ്യാറായില്ലെന്നാണ് ആരോപണം ഉയർന്നത്.

അപകടത്തിൽപെട്ട ഉടനെ സമീപത്തുണ്ടായിരുന്ന ഓട്ടോ ഡ്രെെവർമാരും നാട്ടുകാരും ചേർന്നാണ് വയോധികയെ കൊയിലാണ്ടി ​ഗവ താലൂക്ക് ആശുപത്രിയിൽ എത്തിക്കുന്നത്. പിന്നീട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. എന്നാൽ അപകടം സംഭവിച്ചിട്ട് ഒരുദിവസം പിന്നിടുമ്പോഴും വ​ഗാഡ് കമ്പനി സംഭവത്തിൽ പ്രതികരിക്കാത്തതിനെതിരെ ജനരോഷം ഉയരുന്നുണ്ട്.

അപകട വിവരം അധികൃതരെ അറിയിച്ചിരുന്നു. എന്നാൽ നേരിട്ടോ ഫോൺ മുഖേനയോ വയോധികയുടെ ബന്ധുക്കളെ ബന്ധപ്പെടാൻ വ​ഗാഡ് കമ്പനി തയ്യാറായിട്ടില്ലെന്ന് മരുതൂർ വാർഡ് കൗൺസിലർ പി പ്രമോദ് കൊയിലാണ്ടി ന്യൂസ് ഡോട് കോമിനോട് പറഞ്ഞു. സംഭവത്തിൽ കൊയിലാണ്ടി പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

Related News- മുത്താമ്പിയില്‍ വാഗാഡ് ലോറിയുടെ ടയര്‍ ഊരിത്തെറിച്ച് പരിക്കേറ്റ് ചികിത്സയിലിരുന്ന വയോധിക മരിച്ചു

നടേരി നരസിംഹമൂര്‍ത്തി ക്ഷേത്രത്തിന് സമീപത്തുവെച്ച് ഓടിക്കൊണ്ടിരിക്കുന്ന വാഗാഡ് ലോറിയുടെ ടയര്‍ ഊരിത്തെറിച്ചാണ് മരുതൂര്‍ തെക്കെ മഠത്തില്‍ കല്ല്യാണിക്ക് ​ഗുരുതരമായി പരിക്കേറ്റത്. ചികിത്സയിലിരിക്കെ ഇന്ന് കോഴിക്കോട് മെഡിക്കല്‍ കോളേജ് ആശുപത്രിയിൽ വെച്ച് മരണം സംഭവിക്കുകയായിരുന്നു.

Summary: A serious charge against Vagad company in the incident of the death of an elderly woman due to a burst tire of a vehicle in Naderi