കൊയിലാണ്ടി: മാലിന്യ മുക്തം നവകേരളം പദ്ധതിയുടെ ഭാഗമായി കൊയിലാണ്ടി നിയോജക മണ്ഡലം മോണിറ്ററിംഗ് സമിതി യോഗം കാനത്തിൽ ജമീല എംഎൽഎ ഉദ്ഘാടനം ചെയ്തു. നിയോജകമണ്ഡലത്തിന് കീഴിലുള്ള തദ്ദേശസ്വയം ഭരണ സ്ഥാപനങ്ങളുടെ മാലിന്യ ശുചിത്വ പ്രവർത്തനങ്ങൾ എംഎൽഎയുടെ നേതൃത്വത്തിൽ അവലോകനം ചെയ്തു.

ഹരിത കർമ്മ സേന അംഗങ്ങൾക്ക് പ്രതിമാസ വേതനം സമയബന്ധിതമായി നൽകുവാൻ തദ്ദേശ സ്വയംഭരണ സ്ഥാപനങ്ങൾ മോണിറ്ററിംഗ് പ്രവർത്തനം ഊർജ്ജിതപ്പെടുത്തണമെന്നും ഹരിത കർമ്മ സേന പ്രവർത്തനങ്ങളുടെ ശ്ലാഘനീയമാണെന്നും ഉദ്ഘാടന പ്രസംഗത്തിനിടെ എംഎൽഎ പറഞ്ഞു.

വീടുകൾ, സ്ഥാപനങ്ങൾ എന്നിവയിൽ നിന്നും അജൈവ മാലിന്യങ്ങൾ ഹരിത കർമ്മ സേനയ്ക്ക് നൽകിയതിന്റെ പുരോഗതി, യൂസർ ഫീ ശേഖരണം, ഹരിത കർമ്മ സേന അംഗങ്ങളുടെ പങ്കാളിത്തം തുടങ്ങിയ വിഷയങ്ങൾ യോഗത്തിൽ പരിശോധിച്ചു. 2024 ജനുവരി 26ന്‌ മാലിന്യമുക്തം നവകേരളം പ്രഖ്യാപനം നടത്തുന്നതിന് ഓരോ തദ്ദേശ സ്ഥാപനങ്ങളും നേരിടുന്ന പ്രശ്നങ്ങളും നിലവിൽ ഉള്ള പ്രവർത്തന പുരോഗതിയും യോഗം വിശദമായി ചർച്ച ചെയ്തു.

2023 ജൂൺ മുതൽ ഒക്ടോബർ വരെ പയ്യോളി മുനിസിപ്പാലിറ്റി 60.38, കൊയിലാണ്ടി മുനിസിപ്പാലിറ്റി 47.47, ചേമഞ്ചേരി 50.42, ചെങ്ങോട്ടുകാവ് 45.82, തിക്കോടി 42.11, മൂടാടി 32.41 എന്നിങ്ങനെയാണ് ഒരോ തദ്ദേശ സ്വയംഭരണ സ്ഥാപനങ്ങളിലും യൂസർ ഫീ കളക്ഷൻ ലഭിച്ചതിന്റെ ശരാശരി ശതമാന കണക്ക്. മണ്ഡലത്തിലെ ആകെ 77 കോഴിക്കടകളിലെ മാലിന്യം ശാസ്ത്രീയമായി സംസ്കരിക്കുന്നുണ്ട്. 52 ജലാശയങ്ങളിൽ നിന്ന് മാലിന്യം നീക്കം ചെയ്തിട്ടുള്ളതായും യോഗം വിലയിരുത്തി.

എംഎൽഎ ശുചിത്വ പ്രതിജ്ഞ ചൊല്ലി ആരംഭിച്ച യോഗത്തിൽ കൊയിലാണ്ടി മുനിസിപ്പാലിറ്റി ചെയർപേഴ്സൺ സുധ കിഴക്കേപാട്ട് അധ്യക്ഷത വഹിച്ചു. ഇന്റെർണൽ വിജിലൻസ് ഓഫീസർ ടി.ഷാഹുൽ ഹമീദ് പ്രവർത്തന റിപ്പോർട്ട് അവതരിപ്പിച്ചു.

ഗ്രാമപഞ്ചായത്ത് പ്രസിഡന്റുമാരായ സതി കിഴക്കയിൽ, ഷീബ മലയിൽ, സി.കെ ശ്രീകുമാർ, കൊയിലാണ്ടി നഗരസഭാ സെക്രട്ടറി എസ്.ഇന്ദു, മേലടി ബ്ലോക്ക് സെക്രട്ടറി ജോബി സലാഷ്, പയ്യോളി നഗരസഭ ഹെൽത്ത്‌ ഇൻസ്‌പെക്ടർ പ്രജീഷ് കുമാർ, തിക്കോടി അസിസ്റ്റൻറ് സെക്രട്ടറി കെ.ഇന്ദിര, പന്തലായനി ബ്ലോക്ക് ജി ഇ ഓ എം മനോജൻ, ജില്ലാ ഓഫീസ് സൂപ്രണ്ട് കെ വി കൃഷ്ണൻ എന്നിവർ സംസാരിച്ചു.