തണ്ടര്‍ബോള്‍ട്ടും പോലീസുമടക്കം വന്‍ സന്നാഹം, ആശുപത്രിക്ക് പുറത്തും അകത്തും വന്‍ സുരക്ഷ! പോലീസ് പിടിയിലായ മാവോയിസ്റ്റ് പ്രവര്‍ത്തകനെ വൈദ്യ പരിശോധനയ്ക്കായി കൊയിലാണ്ടി താലൂക്ക് ആശുപത്രിയില്‍ എത്തിക്കുന്ന ദൃശ്യങ്ങള്‍ കാണാം
കൊയിലാണ്ടി: കൊയിലാണ്ടിയില്‍ നിന്നും കഴിഞ്ഞ ദിവസം പിടിയിലായ മാവോയിസ്റ്റ് പ്രവര്‍ത്തകന്‍ തിരുനെല്‍വേലി സ്വദേശി അനീഷ് ബാബുവിനെ വൈദ്യ പരിശോധനയ്ക്കായി കൊയിലാണ്ടി താലൂക്ക് ആശുപത്രിയിലെത്തിച്ച ദൃശ്യങ്ങള്‍ പുറത്ത്‌. തണ്ടര്‍ബോള്‍ട്ടും, പോലീസുകാരുമടക്കം വന്‍ സുരക്ഷ ഒരുക്കിയാണ് ഇയാളെ ആശുപത്രിയിലെത്തിച്ചത്‌.
ഉയർന്ന പോലീസ് ഉദ്യോഗസ്ഥരായ എസ്.പി കറപ്പ് സാമി, വടകര ഡി.വൈ എസ്.പി ആർ.ഹരിപ്രസാദ്, ക്യൂ ബ്രാഞ്ച് ഉദ്യോഗസ്ഥർ, തണ്ടര്‍ബോള്‍ട്ട്, എന്‍.ഐ.എ ഉദ്യോഗസ്ഥര്‍ എന്നിവരടങ്ങിയ സംഘം രാത്രി ഏഴരയോടെ ചോദ്യം ചെയ്ത ഇയാളെ കോഴിക്കോട് സ്‌പെഷ്യല്‍ കോടതിയിലേക്ക് കൊണ്ടുപോവും വഴിയാണ്‌ കൊയിലാണ്ടി താലൂക്ക് ആശുപത്രിയില്‍ വൈദ്യ പരിശോധനയ്ക്ക് എത്തിച്ചത്‌.
വൈദ്യ പരിശോധനയ്ക്ക് ശേഷം പോലീസ് വാഹനത്തില്‍ കയറിയ അനീഷിനോട് എന്തെങ്കിലും പറയാനുണ്ടോയെന്ന് മാധ്യമ പ്രവര്‍ത്തകര്‍ ചോദ്യച്ചപ്പോള്‍ ‘ഐ വോസ് കിഡ്‌നാപ്ഡ് ബൈ പോലീസ്, ദി കസ്റ്റഡി വോസ് നോട്ട് പ്രോപ്പേര്‍ലി’ യെന്ന്‌ അനീഷ് മറുപടി നല്‍കുന്നത് വീഡിയോ ദൃശ്യങ്ങളില്‍ കാണാം.
മാവോയിസ്റ്റ് പ്രവര്‍ത്തകര്‍ക്കിടയില്‍ കൊറിയര്‍ എന്ന പേരില്‍ അറിയപ്പെടുന്ന അനീഷ് ബാബു കോഴിക്കോട്, വയനാട്, മലപ്പുറം ജില്ലകളില്‍ പലതവണ എത്തിയതായി മാവോയിസ്റ്റ് പ്രത്യേക ഓപ്പറേഷന്‍ ഗ്രൂപ്പിന് വിവരം ലഭിച്ചിരുന്നു. തുടര്‍ന്ന് നടത്തിയ നിരീക്ഷണത്തിലാണ് ഇയാള്‍ പിടിയിലാവുന്നത്.