നാദാപുരം: എടച്ചേരിയില്‍ ഇടിമിന്നലേറ്റ് തൊഴിലുറപ്പ് തൊഴിലാളികള്‍ക്ക് പരിക്ക്. പരിക്കേറ്റ എട്ട് സ്ത്രീകളെ വിവിധ ആശുപത്രികളിൽ പ്രവേശിപ്പിച്ചു. നോര്‍ത്ത് എടച്ചേരിയില്‍ ഇന്ന് ഉച്ചയ്ക്ക് നാല് മണിയോടെയാണ് സംഭവം. ഉച്ചഭക്ഷണത്തിനു ശേഷം പണിയിടത്തിലേക്ക് ഇറങ്ങിയപ്പോഴായിരുന്നു ഇടിമിന്നലേറ്റത്.

ശബ്ദം കേട്ട് നാട്ടുകാരും അടുത്തുള്ള സ്കൂളിലെ അധ്യാപകരും സംഭവസ്ഥലത്തേക്ക് ഓടിയെത്തുകയായിരുന്നു. ഒരാള്‍ക്ക് പൊള്ളലേറ്റിട്ടുണ്ട്. ബാക്കിയുള്ള ഏഴ് പേരുടെ പരിക്ക് നിസാരമാണ്. ഇവരെ നാദാപുരം ഗവണ്‍മെന്റ് ആശുപത്രിയിലും പൊള്ളലേറ്റ സ്ത്രീയെ വടകര ഗവണ്‍മെന്റ് ആശുപത്രിയിലും പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു.