പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസ്‌; വെങ്ങളം സ്വദേശിയായ യുവാവ് പിടിയില്‍
കൊയിലാണ്ടി: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ യുവാവ് അറസ്റ്റില്‍. വെങ്ങളം സ്വദേശി ഷംസുദ്ദീനാണ്(26) പിടിയിലായത്. ഇയാളെ വീട്ടിലെത്തിയാണ് കൊയിലാണ്ടി പോലീസ് അറസ്റ്റ് ചെയ്തത്. രണ്ട് ദിവസം മുമ്പാണ് കേസിനാസ്പദമായ സംഭവം.
പെണ്‍കുട്ടിയുടെ പരാതിയുടെ അടിസ്ഥാനത്തില്‍ ഇയാളെ പിടികൂടാനായി വെങ്ങളത്തെ വീട്ടിലെത്തിയ പോലീസ് സംഘത്തെ കണ്ട് പ്രതി വീടിന് പിറകിലൂടെ രക്ഷപ്പെടാന്‍ ശ്രമിച്ചിരുന്നു. തുടര്‍ന്ന് അതി സാഹസികമായാണ് ഇയാളെ പിടികൂടിയത്. പ്രതിക്കെതിരെ പോക്‌സോ നിയമപ്രകാരം കേസെടുത്തു.
കൊയിലാണ്ടി മേഖലയില്‍ വഗാഡ് കമ്പനിയുടെ സൈറ്റുകളില്‍ നിന്നും ഇരുമ്പ് കമ്പിയും മറ്റ് അനുബന്ധ ഉപകരണങ്ങളും മോഷ്ടിച്ച കേസിലും ഇയാള്‍ പ്രതിയാണ്. മോഷണക്കേസില്‍ പിടിയിലായ ഇയാള്‍ക്ക് അടുത്തിടെയാണ് ജാമ്യം ലഭിച്ചത്‌.
കൊയിലാണ്ടി പോലീസ് സർക്കിൾ ഇൻസ്പെക്ടർ എം.വി ബിജു, എസ്ഐമാരായ പി.എം ശൈലേഷ്, എ.അനീഷ്, വിശ്വൻ പുതിയേടത്ത്, എസ്.സി.പി.ഒ.മാരായ ബിജു വാണിയംകുളം, കരിം, നിമേഷ്, ദിലീപ്, പിങ്ക് പോലീസ് ദിവ്യ എന്നിവരടങ്ങുന്ന സംഘമാണ് പ്രതിയെ പിടികൂടിയത്.