കീഴരിയൂർ: കീഴരിയൂരിൽ തെങ്ങ് കടപുഴകി വീണു അപകടം. കീഴരിയൂർ കുറുമയിൽത്താഴ പ്രൈമറി ഹെൽത്ത് സെന്ററിനു സമീപമുള്ള പറമ്പിൽ നിന്നുമാണ് തെങ്ങ് കടപുഴകി 11 കെ.വി ലൈനിൽ വീണത്. പോസ്റ്റ് പൊട്ടി റോഡിൽ വീണതിനെ തുടർന്ന് വിവിധയിടങ്ങളിലെ വൈദ്യുതി ബന്ധം വിച്ഛേദിക്കപ്പെട്ടു.

ഇന്നലെ രാത്രി ഏഴു മണിയോടെയായിരുന്നു സംഭവം. കൊയിലാണ്ടിയിൽ നിന്നും അഗ്നിരക്ഷസേന സ്ഥലത്തെത്തി നാട്ടുകാരുടെ സഹായത്തോടെ മരം മുറിച്ചു മാറ്റി. തുടർന്ന് രാത്രി തന്നെ അരിക്കുളം കെ.എസ്.ഇ.ബി സെക്ഷനിൽ നിന്നും ജീവനക്കാരെത്തി ഒരു ഭാഗം ഒഴികെ മറ്റെല്ലാ സ്ഥലത്തെയും വൈദ്യുതി ബന്ധം പുനസ്ഥാപിച്ചു.

ഗ്രേഡ് എ.എസ്.ടി.ഓ പ്രദീപിന്റെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർമാരായ സിജിത്ത് സി, സനിൽരാജ്, ധീരജ്ലാൽ പി.സി, സജിത് , ഹോംഗാർഡ് രാജേഷ് കെ.പി എന്നിവർ പ്രവർത്തനത്തിൽ പങ്കെടുത്തു.